Սիրիայի կառավարական զորքերը տակառային ռումբերով շարունակում են գրոհել քաղաքացիական շրջանները, Հալեպում զինվորականների գործողությունները կարելի է համարել հանցագործություն մարդկության դեմ՝ ասվում է իրավապաշտպան Amnesty International կազմակերպության նոր զեկույցում:
«Լայնորեն տարածում գտած վայրագությունները, մասնավորապես՝ կառավարական ուժերի արատավոր ու անխնա ռմբակոծությունները Հալեպի քաղաքացիական անձանց կյանքը դարձրել են անտանելի: Խաղաղ շրջաններում այդ դատապարտելի ու կանոնավոր հարվածները, գիտակցական ու պարբերական հարձակումները քաղաքացիական անձանց վրա զինվորական հանցագործություն են և հանցագործություն մարդկության դեմ»,- հայտարարել է Amnesty International-ի Մերձավոր Արևելքի ու Հյուսիսային Աֆրիկայի ծրագրի տնօրեն Ֆիլիպ Լյուտերը:
Զեկույցում նաև նշվում է, որ ամենից շատ ավերածություններ ու արյունահեղությւոն է բերում տակառային, հաճախ նավթային ռումբերի կիրառությունը:
Amnesty International-ի տվյալով՝ նման ռումբեր գցում են կառավարական զորքերը դպրոցների, հիվանդանոցների, մզկիթների ու շուկաների վրա: Զեկույցում նշվում է, որ անցած ամիս Հալեպի վրա նետվել է 85 տակառային ռումբ, ինչի հետևանքով զոհվել է նվազագույնը 110 խաղաղ բնակիչ:
