Սերբիայի և Կոսովոյի անդամակցությունը ԵՄ-ին կախված է Բելգրադի և Պրիշտինայի երկխոսության հստակ արդյունքներից: Ինչպես հաղորդում է ITAR-TASS-ը, այս մասին հայտարարել է Եվրոպական խորհրդի նախագահ Հերման Վան Ռոմպեյը՝ Կոսովոյի ինքնահռչակ հանրապետության վարչապետ Հաշիմ Տաչիի հետ հանդիպումից հետո:
«Հստակ արդյունքները որոշիչ նշանակություն ունեն»,-ասել է նա լրագրողներին:
Վան Ռոմպեյը նաև նշել է, որ «Կոսովոն եվրոպական հեռանկար ունի», սակայն Պրիշտինան սկզբում պետք է կատարի կարճաժամկետ նպատակներ, որը Եվրահանձնաժողովը դրել է նրա առաջ: Առաջին հերթին դա վերաբերում է էթնիկ փոքրամասնությունների իրավունքների պահպանմանը, կաշառակերության, հանցագործության դեմ պայքարին:
Բացի այդ, ԵԽ առաջնորդն իր զրուցակցին կոչ է արել Կոսովոյում օրենքի գերակայության հետ կապված հարցերով է՛լ ավելի ակտիվ համագործակցել ԵՄ առաքելության հետ:
Կոսովոյի վարչապետը հանդիպել է նաև Եվրոպական հանձնաժողովի նախագահ Ժոզե Բարոզուի հետ, որից հետո մեկնել է Սերբիայի վարչապետ Իվից Դաչիչի հետ երկկողմ հանդիպման:
