Գերմանիայի դաշնային սահմանադրական դատարանը վճռել է ընդլայնել միասեռական զույգերի՝ երեխաների որդեգրման իրավունքները: Այս մասին ասվում է դատարանի հաղորդագրության մեջ:
Սեռական փոքրամասնության փաստաբաններն ու պաշտպանները այդ որոշումը քայլ են համարում երեխաների որդեգրման հարցում լիակատար արգելքի վերացման ճանապարհին՝ հայտնում է RIA Novosti-ն:
Ներկայում Գերմանիայում միասեռական զույգերը, որոնք պաշտոնապես գրանցել են քաղաքացիական միությունը, սահմանափակ հնարավորություններ ունեն երեխաների որդեգրման հարցում: Կողակիցներից մեկը կարող է որդեգրել մյուսի երեխային: Բացի այդ՝ որդեգրում է թույլատրվում միայն կողակիցներից մեկին, իսկ երկրորդը կարող է սահմանափակ իրավունքներ ստանալ նրան դաստիարակելու հարցում, սակայն ոչ՝ որդեգրման:
Այսօր Գերմանիայի ՍԴ-ում որոշեցին, որ վերջին կետը հակասում է Սահմանադրությանը:
Համաձայն այսօր ընդունված որոշման՝ քաղաքացիական ամուսիններից մեկը կկարողանա երեխայի որդեգրման իրավունք ստանալ, որը նախկինում որդեգրվել էր մյուս կողակցի կողմից:
Գերմանիայի ՍԴ-ն օրենսդիր մարմիններին պարտավորեցրել է մինչև 2014թ. հունիսի 30-ը համապատասխան փոփոխություններ կատարել գործող օրենսդրությունում:
Միասեռական զույգերի համատեղ որդեգրումը, ինչպես նախկինում, արգելված է:
