Ուրբաթ օրը Միլանում պաշտոնապես կազդարարվի ԷՔՍՊՕ-2015 համաշխարհային ունիվերսալ ցուցահանդեսի մեկնարկը՝ հայտնում է TASS-ը: Խոշորագույն միջազգային ցուցադրությանը կմասնակցեն 144 երկիր, տասնյակ միջազգային և ոչ կառավարական կազմակերպություններ, հարյուրավոր ընկերություններ:
ԷՔՍՊՕ-2015-ը կանցկացվի «Կերակրել մոլորակին. Կյանքի էներգիա» կարգախոսով և նվիրված կլինի պարենային անվտանգության, գյուղատնտեսական տեխնոլոգիաների զարգացման, շրջակա միջավայրի պահպանության և բնական ռեսուրսների տնտեսման, ինչպես նաև տարբեր շրջանների խոհանոցային ավանդույթների վերաբերյալ հարցերին:
Ցուցասրահում ստեղծվել է 52 ազգային տաղավար: Հարթակ ունեն նաև որոշ խոշորագույն միջազգային սննդային կորպորացիաներ, օրինակ՝ Coca-Cola-ն: Այն երկրները, որոնք սեփական տաղավար չունեն, իրենց ցուցանմուշները կներկայացնեն թեմատիկ տաղավարներում: Բացի դրանից՝ առանձին տաղավարներ նվիրված կլինեն սննդի և գյուղատնտեսության պատմությանը, սննդային արտադրության ոլորտում ինովացիաներին, կենսաբազմազանությանը և դրա պահպանությանը:
Սպասվում է, որ կես տարում ցուցահանդես կայցելի մինչև 20 մլն մարդ:
Ցուցահանդեսի կազմակերպումն արժեցել է 1.3 մլրդ եվրո: Սպասվում է, որ գովազդից և տոմսերի վաճառքից ստացված եկամուտը կհասնի 800 մլն եվրոյի:
Կազմակերպիչների տեղեկությամբ՝ մինչև հիմա մոտ 10 մլն տոմս է վաճառվել: Ցուցահանդեսում միջին էքսկուրսիան հաշվարկված է 6-7 ժամ, մեծահասակների համար մեկօրյա տոմսն արժե 32 եվրո:
ԷՔՍՊՕ-2015-ը կտևի մինչև հոկտեմբերի 31-ը:
