Երեկ ՀՀ վարչապետ Տիգրան Սարգսյանը քվեարկում էր 10/21 ընտրատեղամասում, որը տեղակայված է Երևանի Լևոն Շանթի անվան թիվ 4 միջնակարգ դպրոցում: «Հայկական ժամանակը» գրում է, որ նա քվեաթերթիկը ստանալուց հետո քվեախուց մտավ իր երկու երեխաների հետ:
«Դա խախտում է, պարոն վարչապետ»,- քվեախցից դուրս գալուց հետո «ՀԺ»-ն բարձրաձայն ասաց վարչապետին: «Երեխաների հետ կարելի է»,- մի փոքր շփոթված, բայց ժպտալով պատասխանեց վարչապետը: «Անչափահասների հետ կարելի է, չի արգելվում»,- դեմքի համապատասխան արտահայտությամբ բացականչեց տեղամասային հանձնաժողովի նախագահը: Այսքանից պարզ դարձավ, որ ո՛չ վարչապետը, ո՛չ էլ հանձնաժողովի նախագահը չեն տիրապետում Ընտրական օրենսգրքին: ՀՀ ընտրական օրենսգրքի համաձայն, քվեախցում չի կարող լինել ոչ ոք, բացի այն դեպքից, երբ ընտրողը տարբեր պատճառներով չի կարող ինքնուրույն լրացնել քվեաթերթիկը: ՀՀ վարչապետը, բարեբախտաբար, այդ կատեգորիայի ընտրողների մեջ չի մտնում: Բայց սա, իհարկե, հումորի ոլորտից է:
Օգտվելով վարչապետին հարցեր ուղղելու հնարավորությունից՝ «ՀԺ»-ն փորձեց պարզել, թե որն էր ՀՀ նախագահի թեկնածու Սերժ Սարգսյանի նպատակը, երբ քարոզարշավի վերջին օրերին ընդգծված ընդդիմադիր դիրքերից էր հանդես գալիս, խոսում էր մի խումբ հարուստների մասին, ովքեր պատանդ են պահում իշխանությանը, խոսում էր մարդկանց մասին, ովքեր ամեն ինչ գնում են, իսկ ինչ չեն կարողանում գնել, խլում են ու այդպես խլում են մեր ապագան…:
– Պարոն վարչապետ, Սերժ Սարգսյանը քարոզարշավի վերջին օրերին ակնարկում Էր, որ իշխանությունը պատանդ է մի քանի հարուստների ձեռքին: Դուք ճանաչո՞ւմ եք այդ հարուստներին, ովքեր իշխանությանը պատանդ են պահում:
– Այսօր թեկնածուների անունները տալը ճիշտ չէ:
– Լավ, չասենք՝ Սերժ Սարգսյանը, ասենք՝ թեկնածուներից մեկն է ակնարկել, որ իշխանությունը պատանդ է մի քանի հարուստների ձեռքին, ճանաչո՞ւմ
եք այդ հարուստներին:
– Ես կարծում եմ՝ այդ հարցադրման բովանդակությունը լավ հասկացել ես, ինչի՞ մասին է խոսքը գնում: Եվ այդ երևույթները, որոնք կան Հայաստանի Հանրապետությունում, պետք է հաղթահարենք համատեղ ջանքերով:
– Սերժ Սարգսյանը ինչ-որ խմբավորումների մասին էր խոսում, ասում էր՝ մի խումբ մարդիկ խլել են մեր ապագան: Ովքե՞ր են դրանք:
– Ո՞վ էր ասում:
– Թեկնածուներից մեկը:
– Ո՞ր թեկնածուն:
– Վեցերորդ համարը:
– Եկեք քաղաքական հարցադրումներին անդրադառնանք վաղը:
– Շատ լավ:
Քիչ անց իր մեքենան նստելուց առաջ վարչապետը հիշեց, որ նկատել ենք քվեախցում մենակ լինելու օրենսդրական պահանջի խախտումը և հարցրեց. «Հայկ, իսկ ուրիշ խախտում չես արձանագրե՞լ»: «Ո՞նց չեմ արձանագրել, պարոն վարչապետ, ձեր մեքենան կանգնած է «զեբրի» վրա (հետիոտնի համար նախատեսված անցման շերտագծերին- խմբ.)»,- ներկայացրի դիտարկումս: Վարչապետը մի փոքր հետ քաշվեց, նայեց, համոզվեց ու ժպտալով նստեց մեքենան: Բայց թե, սա էլ է, իհարկե, հումորի ոլորտից: Ավելի հետաքրքիր է վարչապետի ասած «վաղը», որն այսօր է: Տեսնենք՝ նա կանդրադառնա՞ այդ հարցին, կխոսի՞ այն խմբավորումների մասին, որոնք խլել են մեր ապագան, կասի՞, թե ովքեր են այն հարուստները, ում ձեռքին պատանդ է իշխանությունը: Այ, եթե անկեղծորեն ասի, ապա երեխաների հետ քվեախուց մտնելու և երթևեկության կանոնների աննշան խախտումների վրա կարելի է ուշադրություն չդարձնել:
Քիչ մնաց մոռանայինք: Երեկվա դրությամբ դեռ բաց էր մնացել այն հարցը, թե ինքը՝ Տիգրան Սարգսյանը, ցանկանո՞ւմ է արդյոք մնալ վարչապետ: «Դուք ուզո՞ւմ եք մնալ վարչապետ, թե՞ ոչ»,- երեկ «ՀԺ»-ն ուղիղ հարցրեց վարչապետին: «Հետաքրքիր հարց է, կմտածեմ»,- պատասխանեց վարչապետը:
Տեսնես, այդ հարցի պատասխանը ե՞րբ կտա գործող վարչապետը:
