Վահան Զատիկյանի անվան դպրոցում տեղակայված 8/06 ընտրատեղամասում քվեաթերթիկները հաշվարկելու ժամանակ նկատելի դարձավ, որ կարող է Րաֆֆի Հովհաննիսյանի ձայները Սերժ Սարգսյանի ձայներից ավելի շատ կլինեն: Հանձնաժողովի անդամներն ինչ-որ պահի սկսեցին դանդաղեցնել հաշվարկը,իսկ հաշվարկելուց հետո նախ չհայտարարեցին թվերը, հետո առանձնացան մեկ այլ սենյակում, կարճ ժամանակ հետո դուրս եկան և սկսեցին քվեաթերթիկները նորից տեղաշարժել, այսուայն կողմ տանել: Հետո Ս. Սարգսյանի վստահված անձը բավականին աննկատ մի տրցակ քվեաթերթիկ վերցրեց Ր. Հովհաննիսյանի քվեաթերթիկներից ու մտավ կողքի սենյակը: Մինչ «Առաջին լրատվական»-ի լրագրողը դա կնկատեր ու կբարձրաձայներ, գողացված քվեաթերթիկներն արդեն ոչնչացվել էին: Իսկ հանձնաժողովի նախագահ ԲՀԿ-ական Մարիետա Մկրտչյանը հակադարձեց, թե միանգամից էր պետք այդ մասին ասել:
Մինչ հանձնաժողովի անդամներն ու նույնիսկ վստահված անձինք Ս. Սարգսյանի ու Ր. Հովհաննիսյանի քվեաթերթիկների թվերն էին համեմատում ու հարմարեցնում, տիկին Մկրտչյանը դրա նկատմամբ անուշադիր՝ անվավեր քվեաթերթիկներն էր ջոկջկում:
Իսկ հաշվարկից հետո, երբ «Առաջին լրատվական»-ի նկարահանող խումբը դուրս էր գալիս դպրոցից, դրսից նկատեցինք, որ ՀՀԿ-ի անդամներն ու Ս. Սարգսյանի վստահված անձինք խփում են ՀԱԿ անդամ Էդուարդ Խրոյանին: Երբ ներս մտանք՝ հարցնելու համար, թե ինչէ պատահել, քաշքշուկը միանգամից դադարեցրեցին և ասացին, որ նման բան չկա: Նույնիսկ ՀԱԿ անդամը հերքեց, որ իրեն քաշքշել ու հարվածել են: Իսկ Մ. Մկրտչյանն էլ ասաց, թե ինքը քաշքշոց չի տեսել:
