Գյումրիում ընտրակաշառքը վերաորակվել է որպես «տրանսպորտային ծախս», ինչը նորություն է: Այնուամենայնիվ, առաջընթաց է նաև դա, որ ընտրակաշառքը պատճառաբանում են որպես «տրանսպորտային ծախսեր»՝ ընտրողներին ընտրատեղամասեր տեղափոխելու համար. «Առաջին լրատվական»-ի հետ զրույցում, անդրադառնալով Գյումրիում ընտրական անցուդարձին, ասաց «Շիրակ կենտրոն» ՀԿ-ի նախագահ Վահան Թումասյանը:
Հարցին՝ որքա՞ն «տրանսպորտային ծախսեր են տրվում» գյումրեցիներին, Վահան Թումասյանը տեղեկացրեց, որ Գյումրիում 5000-ական դրամներ են բաժանվում: «Ես չեմ լսել, որ դրանից ավելին բաժանեն: Նա, ով գումար է վերցրել, չի գա ասի, որ վերցրել է»,- ասաց նա:
Մեզ հետ զրույցում նա մի հետաքրքիր փաստ արձանագրեց. Գյումրիի հրապարակում այսօր երթուղային տաքսիների կուտակումների՝ «գազելների շքերթի» չի հանդիպել, ինչպես նախկին ընտրությունների ժամանակ: Հարցին՝ ինչո՞վ է դա պայմանավորված, վերջինս պատասխանեց՝ նաև Գյումրիի քաղաքապետի փոփոխությամբ, ու բացի այդ, այժմ դրանք քաղաքապետարանի ենթակայության տակ չեն:
Նրա խոսքով՝ գյումրեցիները գնում են ընտրությունների, մասնակցում են, բայց թե երեկոյան ժ. 20:00-ից հետո ձայները ինչպես կհաշվարկվեն՝ դժվարացավ ասել:
«Համենայնդեպս, Գյումրիի տրամադրությունը իշխանության օգտին չէ: Ընտրակաշառքը չի կարող մեծ դեր խաղալ քվեարկության ժամանակ, եթե, իհարկե, ընտրատեղամասերում չկեղծվեն արդյունքները»,- եզրափակեց Վահան Թումասյանը:
