Մալաթի-Սեբաստիա համայնքի թիվ 8/08 ընտրատեղամասում մի շարք խախտումներ են գրանցվել: «Առաջին լրատվական»-ի նկարահանող խմբի աշխատանքների ընթացքում շուրջ 3 ընտրողներ չկարողացան իրացնել իրենց սահմանադրական իրավունքը. երկու ընտրողի տվյալներ պարզապես չկային ընտրողների ցուցակում, իսկ նրանց փոխարեն լրացված էին փաստացի գրանցված ընտրողների տվյալները, իսկ մեկ ընտրողի փոխարեն արդեն լրացված էին իր տվյալները:
Ինչպես «Առաջին լրատվական»-ի հետ զրույցում տեղեկացրեց 8/08 ընտրատեղամասի հանձնաժողովի նախագահը, այդ ընտրողի դեպքում սխալմունք է տեղի ունեցել՝ հանձնաժողովի անդամը պարզապես մեկ այլ ընտրողի փոխարեն լրացրել է այդ մարդու տվյալները: Հանձնաժողովի նախագահն ասաց, որ այդ սխալմունքը շուտով կշտկվի:
Հետաքրքրական է, որ այս ընտրատեղամասում նախագահի թեկնածու Սերժ Սարգսյանի վստահված անձինք շուրջ 3-ն էին, և այն դպրոցում, որտեղ տեղակայված էր ընտրատեղամասը, մարդկանց կուտակումներ կային, որոնք կազմակերպում էին վստահված անձնաց և հանձնաժողովի անդամների ճոխ ընդմիջումը, իսկ ընդմիջումը կազմակերպողը առաքիչներին վճարում էր 20 հազարական դրամներով: Հանձնաժողովի նախագահը ընտրատեղամասում պատահական անձնաց կուտակումները բացատրեց հետևյալով. «Նրանք բոլորը վստահված անձինք են, հերթափոխով աշխատում են»:
Նկատենք, որ հանձնաժողովի նախագահը բավական ընկճված էր և վախենում էր խնդրել բոլոր «պատահական անձանց» ցույց տալ իրենց՝ վստահված անձ լինելու փաստաթուղթը:
Հիշեցնենք, որ Հայաստանի նախագահի պաշտոնին հավականում է 7 թեկնածու. ՀՀԿ առաջնորդ, Հայաստանի գործող նախագահ Սերժ Սարգսյանը, «Ժառանգություն» կուսակցության ղեկավար Րաֆֆի Հովհաննիսյանը, «Ազատություն» կուսակցության առաջնորդ, նախկին վարչապետ Հրանտ Բագրատյանը, «Ազգայի ինքնորոշում միավորում» կուսակցության նախագահ Պարույր Հայրիկյանը, «Ռադիո հայ» ընկերության խորհրդի նախագահ, քաղաքագետ Անդրիաս Ղուկասյանը, ԼՂՀ նախկին ԱԳ նախարար Արման Մելիքյանը և էպոսագետ Վարդան Սեդրակյանը:
Այս ընտրությունները Հայաստանի նորանկախ պատմության ընթացքում 6-րդ նախագահական ընտրություններ են՝ 1991 թվականին (Լևոն Տեր-Պետրոսյան), 1996 թվականին (Լևոն Տեր-Պետրոսյան), 1998 թվականին (Ռոբերտ Քոչարյան), 2003 թվականին (Ռոբերտ Քոչարյան), 2008 թվականին (Սերժ Սարգսյան):
