ՀՔԱ Վանաձորի գրասենյակը ժ. 12:00-ի դրությամբ արձանագրել է, որ որոշ տեղամասերում չի ապահովվում քվեարկության գաղտնիությունը, կատարվում են լցոնումներ, մարդկանց ուղղորդում են տեղամասեր, իրականացնում բացահայտ քարոզչություն: Ընդ որում՝ բոլոր արձանագրված խախտումները կատարվում են ՀՀ նախագահի թեկնածու Սերժ Սարգսյանի թիմակիցների կողմից:
Այս մասին «Առաջին լրատվական»-ին տեղեկացնում են ՀՔԱ Վանաձորի գրասենյակից:
Ստորև ներկայացնենք մի քանի դեպք՝ ժ. 09:30-ին կազմակերպության դիտորդների կողմից թիվ 30 մանկապարտեզի մոտ՝ 21ՏՍ 880 մակնիշի ավտոմեքենայի դիմաց, արձանագրվել է քվեարկած ընտրողների կուտակում, որոնք ակնկալիքներ են ունեցել այդ ավտոմեքենայում նստած մարդկանցից: Իսկ ժ. 11:30-ի դրությամբ 29/25 ընտրատեղամասի տարածքում արձանագրվել է ընտրակաշառքի բաժանման դեպք:
Գրասենյակն արձանագրել է նաև լցոնումների դեպքեր: Ժամը 09:30-ին 31/05 ընտրական տեղամասում ՀՔԱ Վանաձորի գրասենյակի դիտորդը փաստել է լցոնում, 32/05 ընտրատեղամասում դիտորդը լցոնում է գրանցել ժ. 10:58-ին, 32/14 ընտրատեղամասում դիտորդը ժ. 10:00-ին է արձանագրել լրացված և ստորագրված քվեաթերթիկների լցոնում: Արձանագրված լցոնման դեպքերի մասին տեղեկացնելու համար ԿԸՀ-ից զանգահարել են կազմակերպության դիտորդին և նկատողություն արել նման տեղեկություն տարածելու համար:
32/14 ընտրական տեղամասում ժամը 10:00-ի դրությամբ գրանցվել է բաց քվեարկության 6 դեպք,
իսկ 31/02 ընտրական տեղամասում քվեախցիկների դասավորությունը չի ապահովում քվեարկության գաղտնիությունը: Գրանցվել են նաև ընտրողների ազատ կամքի արտահայտմանը խոչընդոտելու, ընտրողներին ուղղորդելու դեպքեր:
