Քիչ առաջ Հրաչյա Աճառյանի անվան թիվ 72 դպրոցում բացված ընտրատեղամասում քվեարկեց ՀՀ նախագահի թեկնածու Սերժ Սարգսյանի ընտրական շտաբի պետ, ԱԺ նախագահ Հովիկ Աբրահամյանը: Նա ընտրատեղամաս էր եկել թոռնիկի հետ:
Լրագրողների հետ ճեպազրույցում ԱԺ նախագահը հայտարարել է, որ ինքը քվեարկել է Հայաստանի բարգավաճման, մեր հայրենիքի անվտանգության, ապագայի և, իհարկե, ապահով Հայաստանի համար:
Yerkir.am-ի հարցին, թե ինչպես է իր աշխատանքը որպես գործող նախագահի ընտրական շտաբի պետ գնահատում, Աբրահամյանը պատասխանեց, որ արդյունքները ցույց կտան:
Նա համոզմունք հայտնեց, որ մինչ այս որևէ էական խախտումներ չեն հայտնաբերվել, և որ այս ընտրությունները լինելու են ավելի լավը, քան խորհրդարայնական ընտրությունները: «Իշխանություններն ամեն ինչ արել են, որպեսզի ամեն ինչ լինի օրենքի շրջանակում»,- հայտարարեց նա:
Ընտրությունների ընթացքում Հովիկ Աբրահամյանը կլինի կենտրոնական շտաբում և այնտեղից կհամակարգի շտաբի աշխատանքները:
Հարցին` հնարավո՞ր է ընտրություններից հետո ՀՀԿ-ն ԲՀԿ-ի հետ կրկին կոալիցիա կազմի, Աբրահամյանը պատասխանել է. «Ես չեմ բացառում կոալիցիայի ձևավորման որևէ ձևաչափ, ընտրություններից հետո ամեն ինչ պարզ կդառնա»:
