Human Rights Watch իրավապաշտպան կազմակերպությունն Ադրբեջանի միջազգային գործընկերներին կոչ է արել պնդել Ադրբեջանում Եվրոպական խաղերից առաջ կառավարության ձերբակալված քննադատներին ազատ արձակելու հարցում: Այս մասին հայտնում է contact.az-ը:
«Մինչև Եվրոպական խաղերը 2 ամսից պակաս է մնում, բայց մարդու իրավունքների հարցում սարսափեցնող իրավիճակը և կառավարության քննադատների քաղաքականապես մոտիվացված հետապնդումը չի փոխվում»,- հայտարարել է HRW-ի Եվրոպայի և Ասիայի հարցերով տնօրեն Ջեյն Բյուքենենը:
«Ադրբեջանի գործընկերները, ներառյալ՝ ԵՄ-ն, պետք է Ադրբեջանի իշխանություններին կոչ անեն ազատ արձակել կառավարության ձերբակալված քննադատներին և դադարեցնեն նրանց վրա ճնշումը:
Եվրոպացի ղեկավարները պետք է հստակ հայտարարեն, որ հակառակ դեպքում՝ իրենք խաղերի բացմանը բարձրաստիճան պատվիրակություններ չեն ուղարկի»,- ասվում է հայտարարության մեջ:
HRW-ն նաև ձերբակալված իրավապաշտպանների՝ Ռասուլ Ջաֆարովի, Լեյլա և Արիֆ Յունուսների, Ինթիգամ Ալիևի, լրագրող Խադիջա Իսմաիլովայի մասին տեսանյութ է հրապարակել:
Եվրոպական օլիմպիական կոմիտեն պետք է պաշտպանի օլիմպիական շարժման սկզբունքները և հստակ հայտարարի, որ Ադրբեջանի կառավարությունը, մերժելով հիմնարար արժեքները, չի կարող հեղինակավոր միջազգային մարզական միջոցառման տեր լինել, նշվում է հայտարարության մեջ:
