Միջերկրական ծովում՝ Լիբիայի ափերի մոտ, անօրինական ներգաղթյալներով նավում, որը կիրակի Իտալիայի ճանապարհին ենթարկվել էր նավաբեկության, եղել է ոչ թե 700, այլ 950 մարդ։ Այս մասին Կատանիայի դատախազությունում հայտնել է փրկված ներգաղթյալներից մեկը, ով ծագումով Բանգլադեշից է՝ փոխանցում է La Repubblica-ն։
Նրա խոսքով՝ նրանցից 40-50-ը եղել են երեխաներ, 200-ը՝ կանայք։
Նա նշել է, որ մարդիկ նավից չեն կարողացել դուրս գալ, քանի որ տեղափոխության կազմակերպիչները փակել էին դիտահորերը։
Կատանիայի դատախազությունը, որը զբաղվում է ողբերգության հանգամանքների հետաքննությամբ, նշում է, որ նավում եղած անօրինական ներգաղթյալները եղել են Ալժիրից, Եգիպտոսից, Նիգերիայից, Սենեգալից, Մալիից, Զամբիայից, Բանգլադեշից և Գանայից։
Ներկայում հայտնի է 24 զոհվածի ու 28 փրկվածի մասին։ Մնացածը դեռևս համարվում են անհետ կորած։
