ՀՀ արվեստի վաստակավոր գործիչ, թատրոնի և կինոյի դերասան Երվանդ Մանարյանը նոր ստեղծվելիք ՀԱԿ կուսակցությանը չի ցանկանում անդամագրվել: Խնդիրն այն չէ, որ Ե. Մանարյանը դեմ է կուսակցական լինելուն (երիտասարդ տարիներին կուսակցական է եղել դեռ հայրենիք գալուց առաջ), պարզապես չի հասկանում՝ ինչո՞ւ պետք է նույն անունը կրեր կուսակցությունը:
«Արդեն կար ՀԱԿ, ինչո՞ւ նորից ստեղծել նույն անունը կրող կուսակցություն, կարելի էր, չէ՞, անունը փոխել, որ մարդկանց համար պարզ դառնար՝ ՀԱԿ-ը կառույց է, որտեղ հավաքվել էին տարբեր կուսակցություններ՝ խնդիրներ լուծելու, իսկ սա արդեն մեկ կուսակցություն է, մեկ գաղափարակից ընկերների հավաք: Ամեն ինչ խառնվում է իրար, ստեղծվում է շփոթ, որը կարծում եմ` ճիշտ չէ»,- «Առաջին լրատվական»-ի հետ զրույցում ասաց Երվանդ Մանարյանը:
ՀԱԿ-ի համակիրն այն կարծիքին է, որ պետք չէր այս շփոթը ստեղծել, թեև չի կարծում, որ ՀԱԿ գոյություն չունի, քանի որ դեռ կուսակցություններ կան, որոնք շարունակում են մնալ ՀԱԿ-ում. «Ամենատարբեր համոզմունքի և ամենատարբեր ուղղվածության, քաղաքական տրամաբանության կուսակցություններ էին հավաքված, բայց որովհետև ունեին երկրին վերաբերող մեկ ընդհանուր խնդիր, դրա համար հավաքվել էին մի տեղ, որ այդ խնդիրը լուծեին:
Հայտարարություն չեղավ այն մասին, որ այս խումբը չի կարողանում այդ խնդիրը լուծել ու լուծարվում է, և հիմա կուսակցություն են ստեղծում, որը շփոթ է առաջացնում, և դա մեզ չի օգնում: Մեզ պետք չէր այդ շփոթը ստեղծել, որովհետև կուսակցությունը որոշակի համոզմունքներ ունեցող, քաղաքական որոշակի տեսակետներ հետապնդող մարդկանց հավաքականություն է, իսկ նախորդը ամենատարբեր համոզմունքներ ունեցող մեկ ընդհանուր հավաքականություն էր»,- ասաց նա:
Ինչո՞ւ ՀԱԿ-ին չհաջողվեց դրված խնդիրները լուծել, արդյոք ցավալի չէ՞, որ ՀԱԿ-ը սպառվել է, ի վերջո՝ ո՞րն էր ձախողման պատճառը, ի պատասխան մեր հարցերի՝ Երվանդ Մանարյանը նշեց. «Դժվար է ասել, հոգիս, մանավանդ մտավորականներին քաղաքական կուսակցություններին վերաբերող այդպիսի խորը և բարդ հարցեր պետք չէ տալ: Արվեստագետը որոշ խնդիրների ավելի թեթև նայող մարդ է, իսկ սրանք շատ լուրջ քաղաքական խնդիրներ են, որոնց իրենք` քաղաքագետները, կարող են պատասխանել: Չի բացառվում, որ պատասխան տվողներն էլ ինչ-որ տեղ չկարողանան որոշում կայացնել, մեկի մոտ հաջողվում է, մյուսի մոտ՝ ոչ, և դրանից ելնելով՝ պետք չէ եզրակացություններ անել: Քաղաքականությունը հենց դրանով է հետաքրքիր, սա հենց ժամանակի բաբախյունն է: Չի կարող պատահել, որ որևէ մեկը գտնի ճիշտ պատասխանը, և բոլորը գնան նրա հետևից. այդպես չի պատահում, այդպես ճիշտ չէ»,- ասաց Երվանդ Մանարյանը:
Նա խորհուրդ տվեց սպասել ընտրությունների ավարտին, որից հետո արդեն կորոշակիանա՝ որ կուսակցությունն է գնում, որը՝ մնում, հետո արդեն ինքը վերջնականապես կորոշի` ինքը որտեղ է մնում: