ԱՄՆ պետդեպարտամետի ներկայացուցիչները դիմել են Sony Pictures կինոընկերությանը՝ ռուսական քարոզչությանը հակազդելու գործում օգնություն ստանալու նպատակով։ Այս մասին հաղորդում է The Blaze-ն:
WikiLeaks պորտալը հրապարակել է ԱՄՆ պետքարտուղարի տեղակալ Ռիչարդ Սթենգելի և ստուդիայի գլխավոր տնօրեն Մարկ Լինթոնի նամակագրությունը, որում քննարկվել են Ռուսաստանի և ԴԱԻՇ-ի տեղեկատվական քարոզչությանը հակազդելու միջոցները:
«Ինչպես գիտեք, մենք շատ խնդիրներ ունենք Մերձավոր Արևելքում ԴԱԻՇ-ի («Իրաքի և Շամի իսլամական պետություն») գործողությունների, ինչպես նաև Ռուսաստանի և Արևելյան Եվրոպայում նրա գործողությունների տեղեկատվության մեկնաբանման հարցում: Երկու դեպքում էլ այդ տարածաշրջաններում միլիոնավոր մարդիկ կան, ովքեր ստանում են իրականության աղավաղված տարբերակը»,- ասվում է Սթենգելի նամակներից մեկում:
Ի պատասխան՝ Sony-ի ներկայացուցիչը ուղարկել է իր առաջարկությունները՝ խորհուրդ տալով ներգրավել Disney-ի և Fox-ի մեդիա մասնագետներին:
Պետդեպարտամենտի պաշտոնական ներկայացուցիչ Մարի Հարֆը հաստատել է, որ ԱՄՆ կառավարությունը ջանքեր է գործադրում՝ արտասահմանից սպառնալիքներին հակազդելու համար:
