Դանիացի կինոպրոդյուսերները հայտարարել են դերասանուհի Սիլիվիա Կրիստելի մասին կենսագրական ֆիլմի նկարահանումների մասին: Նա եղել է «Էմանուել» էրոտիկ ֆիլմի գլխավոր դերակատարը: Այս մասին հայտնում է Screen Daily պարբերականը:
Նկարահանող խմբի խորհրդատուն կլինի դերասանուհու միակ տղան՝ Արթուր Կրիստելը: «Սիլիվիա Կրիստել. ցանկության օբյեկտ» (Sylvia Kristel: Object of Desire) անվանումով ֆիլմը կթողարկվի 2015-ին:
Սիլիվիա Կրիստելը համաշխարհային հռչակ է ձեռք բերել 1974-ին՝ «Էմանուել» էրոտիկ վեպի էկրանավորումից հետո: Ֆիլմում Կրիստելը մարմնավորել է ֆրանսիացի դիվանագետի կնոջ: Ըստ սյուժեի՝ նա մեկնում է Բանկոկ ամուսնու մոտ, որտեղ կապվում է այլ տղամարդկանց հետ:
Ֆիլմի թողարկվելուց հետո դերասանուհին դժվարությունների է բախվել իր կինոկարիերայում՝ նմանատիպ ֆիլմերում նկարահանվելու առաջարկներ ստանալով: Կարիերայում և անձնական կյանքում դժվարությունների պատճառով նա սկսել է թմրանյութեր օգտագործել: 2006-ին նա գրել է «Մերկ» ինքնակենսագրականը, որը քննադատները լավ են ընդունել:
2012-ին նրա մոտ հայտնաբերվել է կոկորդի և լյարդի քաղցկեղ: Բուժման ընթացքում նա ինսուլտ է տարել: Դերասանուհին մահացել է 2012-ի հոկտեմբերի վերջին 61 տարեկանում:
