«Մեծ կապույտ կետը մտավ ծովածոց», այսպես են ամերիկացի լրագրողները նկարագրել Մանհեթենի մոտ հայտնված աշխարհի խոշորագույն մասնավոր զբոսանավի հայտնվելը: Eclipse-ը, որը պատկանում է ռուս օլիգարխ Ռոման Աբրամովիչին, առանց նախազգուշացման խարիսխ է գցել Նյու Յորքում՝ ցնցելով տեղի նավատերերին: Նրանց խոսքով՝ նման մեծ նավ երբեք չէր հայտնվել իրենց հորիզոններում: Այս մասին հայտնում է NBC-ն:
Ոմանք ենթադրում են, որ Աբրամովիչը որոշել է ժամանակավորապես բնակվել իր զբոսանավում՝ գործերով գտնվելով Նյու Յորքում: Դա ավելի անվտանգ է, քան բազմահարկ հյուրանոցում: Ոմանք էլ կարծում են, որ չծրագրված այցը պայմանավորված է օլիգարխի ընտանիքի մոտալուտ համալրմամբ: Ավելի վաղ հաղորդվել էր, որ «Չելսի» ակումբի սեփականատիրոջ կինը՝ Դաշա Ժուկովան, հղի է: Հավանաբար նրան բժշկական օգնություն է անհրաժեշտ եղել Նյու Յորքում: Սպասվում է, որ նրանց երեխան կծնվի գարնանը:
Աբրամովիչի Eclipse զբոսանավի երկարությունը կազմում է 169 մետր: Այնտեղ կա երկու լողավազան, ուղղաթիռային հարթակներ, շուրջ 30 նավախուց, որոնցում կարող է 80 մարդ տեղավորվել: Այն ունի փոքր ստորջրյա նավ և հակահրթիռային պաշտպանության համակարգ:
