«Թատրոն-X» 4-րդ հանրապետական փառատոնը այսօրվանից կսկսի իր մարզային փուլը։ Երևանյան փուլը, որ սկսվել էր մարտի 21-ին, ամփոփվեց երեկ: Որպես փառատոնի լավագույն դերակատարում՝ կազմակերպիչները նշում են Նարինե Գրիգորյանին` Սերժ Մելիք-Հովսեփյանի բեմադրած «Ազատ զույգը» ներկայացման մեջ: Առանձնացվում են նաև Մարիամ Ղազանչյանի, Հարություն Ազարյանի հաջողված ներկայացումները:
Փառատոնի նախագահ Արա Խզմալյանի խոսքով` երևանյան փուլի բացահայտում են դարձել 27 դպրոցի ինքնագործ և Վ. Բրյուսովի անվան լեզվաբանական համալսարանի թատերախմբերը։
«Թատրոն-X»-ի կարևորագույն նվաճումը փառատոնի նախագահը համարում է բանավեճի մասնագիտական բարձր մշակույթի ձևավորումը: Հիշեցնենք, որ «Թատրոն-X»-ի փառատոնային յուրաքանչյուր ներկայացումից հետո անցկացվում էին բաց, հրապարակային քննարկումներ, որոնց մասնակցում էին անվանի թատերական գործիչներ:
Փառատոնը շարունակվելու է մինչև ապրիլի 28-ը։ Այս տարի «Թատրոն-X»-ին մասնակցում է 31 թատրոն և թատերախումբ Հայաստանից և Արցախից։
