Հայոց ցեղասպանության տարելիցի վերաբերյալ բազում պաստառներ այսօր կարելի է տեսնել աշխարհի տարբեր քաղաքներում՝ Նյու Յորքից մինչև Կիև և Փարիզ, սակայն ոչ մի անմոռուկ և ցուցապաստառ Ռուսաստանի Դաշնությունում: Ինչո՞վ է այս հանգամանքը բացատրվում: «Առաջին լրատվական»-ը Ռուսաստանի հայերի միության փոխնախագահ Գերման Անանյանցից փորձեց պարզել խնդիրը:
Գերման Անանյանցի խոսքով՝ արդեն կան այդպիսի պաստառներ, ամեն ինչ նախապատրաստված է, և երբ գա ապրիլի 24-ը, այդ ժամանակ նախատեսված են և՛ հանրահավաքներ, և՛ երթեր, և՛ պաստառներ:
«Իսկ հիմա մենք իրավունք չունենք նման բան անել, քանի որ այլ երկրում ենք գտնվում: Հիմա ժամանակավրեպ է պաստառներ փակցնելը: Ոչ միայն Մոսկվայում, երեկ ես Մինվոդիում էի, հանդիպել եմ հայկական ակտիվի հետ, որոնք ունեն և՛ պաստառներ, և՛ անմոռուկներ, ապրիլի 17-ին այնտեղ Հյուսիսկովկասյան համալսարանում Ցեղասպանությանը վերաբերող կոնֆերանս է լինելու, որտեղ ելույթ ունեցողների մեծ մասը ռուս պրոֆեսորներ են: Բացի այդ, խաչքարեր կբացվեն Սախալինում, Ամուրում, Բլագովեշչենսկում, Բաշկիրիայի Հանրապետությունում, Մոսկվայի մարզում և այլն: Մեր աշխատանքը եռում է: Բայց այս օրերին Ցեղասպանությանը վերաբերող պաստառներ կախելը սխալ է. սա հո մայիսի 9-ը չէ՞, որը վերաբերում է բոլոր ժողովուրդներին: Սա տոնական երեկո չէ, որ պաստառներ կախեն: Փոխարենը ցուցահանդեսներ են կազմակերպվել այդ թեմայով Մոսկվայում, Սարատովում, Պյատիգորսկում: Իսկ դրոշներ կախելը քաղաքում դեռ վաղ է ու ճիշտ չէ»,- ասաց նա:
Նա, այնուամենայնիվ, իր վրդովմունքը հայտնեց, որ Իրինա Ալեգրովան ապրիլի 24-ին տոնական համերգ է տալու Տվերում:
«Սա արդեն երկրորդ անգամ է, որ նա այդպես է վարվում ու մեր բոլոր փորձերը՝ դադարեցնելու այն, արդյունք չեն տվել: Նա ասում է, որ համերգի սկզբում կհիշատակի Հայոց ցեղասպանության մասին, հետո կերգի հայերեն մի երգ, բայց հետո պիտի երգի իր վուլգար երգերը, այո՞: Դա ինձ դուր չի գալիս: Իսկ, օրինակ, Եվգենի Պետրոսյանը մի քանի տարի առաջ չեղյալ հայտարարեց ապրիլի 24-ին նախատեսված ելույթը, բոլոր տոմսերը հետ վերադարձրին»,- հավելեց Գերման Անանյանցը:
Ռուսաստանի հայերի միության փոխնախագահը տեղեկացրեց, որ ապրիլի 22-ին Մոսկվայում՝ Միությունների տան դահլիճում, մեծ միջոցառում կլինի՝ նվիրված Հայոց ցեղասպանության 100-րդ տարելիցին, որին ներկա են լինելու նախարարներ ու այլ պաշտոնյաներ: «Այսինքն՝ ապրիլի 24-ին Մոսկվայում կլինի հանրահավաք ու երթ, կլինեն պաստառներ, բայց քաղաքում նման բովանդակությամբ պաստառներ չենք կարող կախել, կոնֆլիկտ ու սկանդալ կլինի: Առանց այդ էլ մեզ շատ խանգարում են ադրբեջանցիները: Օրինակ՝ մենք նախատեսում ենք խաչքար բացել Ուղղափառ եկեղեցու տարածքում, իսկ ադրբեջանցիներն ամեն օր դիմումներ ու բողոքներ են գրում, սպառնում են, որ թույլ չեն տա նման քայլ: Դա, բնականաբար, Բաքվի ու Անկարայի պատվերով է արվում: Ժամանակից շուտ նման պաստառներ մենք կարող ենք կախել միայն ՀՀ դեսպանատանը, Ռուսաստանի հայերի միությունում, բայց ոչ քաղաքում: Ես կարծում եմ, որ դա չի կարելի անել: Եթե նման բան լինի, այնպիսի «բազար» կսկսվի: Ադրբեջանցիներն ու թուրքերը բողոքներով հանդես կգան, կծավալվի, իսկ սգո օրը մենք այդ ամենը կօգտագործենք: Հայաստանում ու ԼՂՀ-ում կարող ենք պաստառներ կախել, բայց Ռուսաստանում պետք չէ անել: Առանց այդ էլ բոլորը գիտեն այդ սգո օրվա մասին, բայց Ռուսաստանը բազմազգ է: Ասենք՝ Մինվոդիում շատ ադրբեջանցիներ կան, որոնք ապրում են այստեղ ու չեն ուզում վերադառնալ Ադրբեջան»: