«Ընտրությունը քոնն է» ՀԿ նախագահ Հարություն Համբարձումյանն այսօր լրագրողների հետ հանդիպմանը ներկայացրեց իրենց անցկացրած հետազոտությունների արդյունքները: Ըստ այդմ՝ ընտրարշավն անցել է ազատ մթնոլորտում, բոլոր թեկնածուները կարողացել են ազատ քարոզարշավ անցկացնել Երևանում և մարզերում, իսկ հեռարձակվող ԶԼՄ-ների ոչ խտրական մոտեցումը հասարակությանը հնարավորություն է տվել ազատ կողմնորոշվելու:
Միևնույն ժամանակ, ըստ Հ. Հարությունյանի՝ հայաստանյան քաղաքական դաշտում լուրջ դերակատարում ունեցող մի քանի քաղաքական ուժերի՝ նախագահական ընտրություններին չմասնակցելը հասարակության մոտ հարցականներ է առաջացրել:
«Դրական ենք համարում թեկնածուների ակտիվ քարոզարշավը սոցիալական ցանցերում: Մեծ աշխուժություն մտցրին Րաֆֆի Հովհաննիսյանի ձեռքսեղմումները և թեկնածուի ներկայությունը ուրախության ծեսերում:
Հրանտ Բագրատյանի քարոզարշավում գերակշռում էր տնտեսական մասը, որը հասարակ մարդկանց համար բարդ էր:
Սերժ Սարգսյանի քարոզարշավներն անցնում են մարդաշատ: Մեր մտահոգությունն այն է, որ դպրոցների տնօրեններին և ուսուցիչներին ստիպողաբար են բերում քարոզարշավների:
Բացասական ենք համարում նաև այս քարոզարշավի ընթացքում հեռուստաբանավեճերի բացակայությունը»:
Հարություն Համբարձումյանն անդրադարձավ նաև խախտումներին և ասաց, որ բազմաթիվ սննդի օբյեկտներում օրենքով արգելվում է քարոզչական պաստառներ փակցնել:
Խոսելով Գյումրիի ԲՀԿ-ական քաղաքապետ Սամվել Բալասանյանի՝ Սերժ Սարգսյանին սատարելու հայտարարության մասին՝ բանախոսն ասաց. «Համաձայն օրենքի՝ տեղական ինքնակառավարման մարմինները իրենց լիազորություններն իրականացնելիս իրավունք չունեն քարոզչություն կատարելու, բայց դա խախտում չեմ համարում, որովհետև լրագրողը հարցրել է՝ ո՞ւմ ես ընտրելու, նա պատասխանել է՝ Սերժ Սարգսյանին: Քարոզչություն կհամարվեր, եթե հավաքեր մարդկանց ու ասեր՝ այս մարդուն ընտրեք: Համենայնդեպս, այս դեպքը մեր զեկույցում որպես մտահոգություն է գրանցվել, բայց մենք չենք արձանագրել, որ նա Գյումրիում քարոզչություն է իրականացրել»: