Իրանը, հնարավոր է, աջակցություն է ցուցաբերում Հյուսիսային Կորեային երկրի արևելքում գտնվող գլխավոր հրթիռային զորակայաններից մեկի արդիականացման հարցում, որտեղ անցկացվում է մեծ հեռահարությամբ ծանր հրթիռների փորձնական արձակման նախապատրաստություն: Այս մասին հայտնել է Վաշինգտոնի Ջոն Հոփկինսի համալսարանին կից Ամերիկա-կորեական ինստիտուտը,-փոխանցում է ITAR-TASS-ը:
Ինստիտուտի մասնագետներն ուսումնասիրել են այդ օբյեկտի լուսանկարները, որոնք վերջին կես տարում արվել են կոմերցիոն արբանյակների կողմից: Մասնագետները նշում են, որ «Տոնհե» զորակայանի արդիականացումը սկսվել է դեռևս անցած տարի և հասել կարևոր առաջընթացի:
Նոր մեկնարկային համալիրի շուրջ իրականացվող շինաշխատանքների բնույթի վերուծությունը վկայում է այն մասին, որ իր հրթիռային ծրագրի իրականացման գործում Փխենյանը, հավանաբար, ստանում է Իրանի օգնությունը: Նրանց խոսքերով՝ այդ մասին է վկայում զորակայանի որոշ կառույցների կառուցվածքը, մասնավորապես վառելիքի պահեստարանների, որոնք նման են Իրանում կիրառվող օբյեկտներին:
Մասնագետները ենթադրում են, որ, հավանաբար, իրականացվում են հեղուկ վառելիքով հրթիռի փորձնական արձակման նախապատրաստություններ: Նկատվել է նաև ակտիվ շինարարություն երկրի հյուսիսային հատվածում գտնվող նոր «Սոհե» զորակայանում: