Երեկ «Առաջին լրատվականը» տեղեկացրել էր, որ ապրիլի 11-ին Բելառուսի մայրաքաղաք Մինսկի մետրոյի կայարաններից մեկում տեղի էր ունեցել հզոր պայթյուն, որի հետևանքով զոհերի թիվը այս պահի դրությամբ հասել է 12-ին, իսկ վիրավորներինը գերազանել է 150-ը: Այս մասին հաղորդում է Interfax գործակալությունը: Հայտնի է նաև, որ հաջողվել է պարզել 6 զոհվածների ինքնությունը:
Հիվանդանոցներում այս պահին 100-ից ավելի վիրավորներ բուժօգնություն են ստանում: Նրանցից 22-ը գտնվում են ծանր վիճակում, 30-ը` միջին ծանրության: Այս պահին, տեղեկություններ տուժած հայերի կամ Հայաստանի քաղաքացիների մասին չկան: Կա մեկ ազգանուն` Սլոբոդյան, որը, շատ հավանական է, ունի ուկրաինական ծագում: Մասնագետները Միսկի մետրոյում տեղի ունեցած պայթյունը որակել են որպես ահաբեկչական գործողություն:
Երկրի КГБ-ն հայտարարել է, որ իրենց հաջողվել է պարզել ահաբեկչական գործողության հեղինակին (ներին), որոնց հայտնաբերման ուղղությամբ կատարվում են համապատասխան գործողություններ: Երեկ երեկոյան դեպքի վայր է այցելել նաև Բելառուսի նախագահ Ալեքսանդր Լուկաշենկոն մանկահասակ որդու` Նիկոլայի հետ: Այս սյուժեն ցուցադրվել է տեղի հեռուստաալիքներով:
