Որքան մոտենում են նախագահական ընտրությունները, այնքան ուժգնանում է բարձրաստիճան պաշտոնյաների ու առանցքային դերակատարում ունեցողների տագնապը, քանի որ սպասվում են լուրջ վերադասավորումներ: «Հրապարակը» գրում է, որ մասնավորապես ավելի տագնապած են նրանք, որոնք Սերժ Սարգսյանի սև ցուցակում են հայտնվել դեռևս պատգամավորական ընտրությունների ժամանակ: Օրինակ, մարզպետներից նման վիճակում է Շիրակի մարզպետը՝ Աշոտ Գիզիրյանը, ումից ՀՀԿ-ն դժգոհ է մնացել: Դեռևս պատգամավորական ընտրությունների ժամանակ խոսվում էր, որ Գիզիրյանը ծպտյալ ԲՀԿ-ական է, և Շիրակի մարզում ԲՀԿ-ի տարած մեծաքանակ քվեների մեջ իր լուման ունի նաև նա, ուստի հայտնվել է սև ցուցակում, սակայն Սերժ Սարգսյանը կոշտ քայլերի չգնաց: Բայց դա չի նշանակում, որ դժգոհությունը վերափոխվել է գոհունակության:
Դա հատկապես ընդգծվել է քարոզարշավի շրջանակում վերջերս Շիրակի մարզ կատարած այցելության ժամանակ: Ըստ տարածված լուրերի, Սերժ Սարգսյանը կոշտ զրույց է ունեցել Գիզիրյանի հետ՝ մասնավորապես Արթիկ այցելելուց հետո: Ժողովրդի դժգոհությանը հանդիպելով՝ նախատել է Գիզիրյանին, թե ամենից շատ ֆինանսավորվում է այս մարզի բյուջեն, սակայն ամենից շատ դժգոհություն այստեղի բնակիչներն են ներկայացնում: Ասում են՝ Ազատիչը չի մոռացել նաև Արթիկում ԲՀԿ-ական թեկնածուների հաղթանակը: Խորհրդարանական ընտրությունների ժամանակ այստեղ ՀՀԿ-ական Մխիթար Վարագյանին, Արթիկի քաղաքապետի եղբորը հաղթեց ԲՀԿ-ական Մուշեղ Պետոյանը, իսկ Արման Սահակյանին՝ Սամվել Բալասանյանը: Այդ ժամանակ Գիզիրյանն արդարացել էր, թե Վարագյաններն աշխատող չեն, ժողովուրդն իրենց չի սիրում, այդ պատճառով ընտրեցին Պետոյանին: Այսինքն, դա իր՝ մարզպետի մեղքով չէր: Բայց բոլորի համար էլ պարզ է, որ նման հաղթանակներն ու պարտություններն անմիջապես պայմանավորվում են մարզպետի տրամադրվածությամբ ու տարած աշխատանքով: Ինչևէ, պատգամավորի փոփոխությունից հետո էլ այստեղ դժգոհության մթնոլորտը չի փոխվել, և դա արտահայտվել է նաև Սերժ Սարգսյանի հանդեպ: Եվ դա Ազատիչը վերագրել է Գիզիրյանի անտարբերությանը: Այս լուրերի շարունակությունն էլ այն է, որ մարզպետների փոփոխության շարքում Գիզիրյանը ծիծեռնակն է լինելու:
Սերժ Սարգսյանի վերաբերմունքի մասին «Հրապարակը» փորձեց լսել անձամբ Աշոտ Գիզիրյանին, սակայն նա ասաց, թե հոգեհանգստի է մասնակցում, և հարմար չէ խոսելը: Որոշ ժամանակ անց թերթի հեռախոսազանգին պատասխանեց ինչ-որ մեկը՝ ասելով, թե Գիզիրյանին հարմար չէ խոսելն ընդհանրապես:
