Կուսակցություն դարձող ՀԱԿ-ը «տոտալ» տեռոր է իրականացնում «գծից շեղված» «Ազատություն» կուսակցության և նրա լիդեր Հրանտ Բագրատյանի նկատմամբ, որն ի դեպ, քարոզարշավի ողջ ընթացքում որևէ ակնարկ չի արել ՀԱԿ «ռեպրեսիաների» մասին և ՀԱԿ-ի դեմ: Նրա համակիրները, որոնք ունեն ընտրական հանձնաժողովներում աշխատելու լիցենզիաներ և անցել են համապատասխան դասընթացներ, ինչպես, ասենք, «Ազատության» անդամ Կարինե Պետրոսյանը, չեն ներգրավվում հանձնաժողովների մեջ, ներգրավվածներին էլ հետ են կանչում:
Ավելին, ինչպես տեղեկացնում են «Հրապարակի» աղբյուրները, «Ժողովրդավարական հայրենիքի» նման, «Ազատության» դեպքում ևս փորձ է արվում պառակտել այն՝ ոմանց «տարհանելու» զուրաբյանական փորձված մեթոդով, և դա այն դեպքում, երբ Բագրատյանը ՀԱԿ-ից դուրս գալու հայտարարություն դեռ չի արել, ասել է, որ առժամանակ, մինչև ընտրությունների ավարտ, սառեցնում է իր անդամակցությունը: Ըստ ամենայնի, ՀԱԿ-ը «շտապեցնում» է Բագրատյանին, որ վերջինս հնարավորինս շուտ՝ մինչև ընտրությունների ավարտ, դուրս գա ՀԱԿ-ից, որովհետև մտածում են, որ հնարավոր է նրա ցույց տված ընտրական արդյունքները վերջինիս դարձնեն ընդդիմադիր նոր բևեռ՝ խաթարելով ՀԱԿ ծրագրերը:
Բոլոր դեպքերում, ինչպես տեղեկացրին «Ազատությունից», իրենք կուսակցությունից դուրս գալու որևէ դիմում դեռ չեն ստացել, կուսակցության Գյումրիի 2 ներկայացուցիչ հայտարարություն են արել, ինչի մասին իրենք իմացել են մամուլից:
