Այս տարվա հունվարի 18-ին Լոռու մարզի բնակիչը, չունենալով համապատասխան թույլտվություն՝ «Հայանտառից» այծյամի որս էր կատարել:
Քննչական կոմիտեից տեղեկացնում են, որ ավարտվել է այս գործով նախաքննությունը, ապօրինի որս կատարած քաղաքացուն մեղադրանք է առաջադրվել:
«ՀՀ քննչական կոմիտեի Լոռու մարզային քննչական վարչությունում ավարտվել է այծյամի ապօրինի որս կատարելու դեպքի առթիվ հարուցված քրեական գործի նախաքննությունը:
Նախաքննությամբ ձեռք բերված ապացույցներով պարզվել եւ հիմնավորվել է, որ Լոռու մարզի բնակիչ Ա.Ծատուրյանը, չունենալով այծյամ տեսակի կենդանու որս կատարելու համապատասխան թույլտվություն, 2015 թվականի հունվարի 18-ին՝ ժամը 13-14-ի սահմաններում, բնության հատուկ պահպանվող տարածք չհանդիսացող, «Հայանտառ» ՊՈԱԿ Եղեգնուտի անտառտնտեսության Վահագնիի անտառպետության թիվ 2-րդ պահաբաժնի տարածքում ապօրինի որսացել է այծյամ։ Վերջինիս որսն արգելված է եղել։ Կենդանական աշխարհին պատճառված վնասը գնահատվել է 250.000 ՀՀ դրամ:
Մինչդատական վարույթում ձեռք բերված ապացույցների համակցությամբ՝ Ա. Ծատուրյանին մեղադրանք է առաջադրվել ՀՀ քրեական օրենսգրքի 294-րդ հոդվածի 1-ին մասի 1-ին կետով»,- տեղեկացնում են քննչական կոմիտեից՝ հավելելով, որ քրեական գործը, մեղադրական եզրակացությամբ, 2015 թվականի ապրիլի 11-ին ուղարկվել է քրեական գործով նախաքննության օրինականության նկատմամբ հսկողություն իրականացնող դատախազին։
