Վրացական Apsny.ge կայքի փոխանցմամբ, Վրաստանի փոխարտգործնախարար Նինո Քալանդաձեն մեկնաբանել է իսրայելական Elbit Systems զենք արտադրող ընկերության դատական հայցն ընդդեմ Վրաստանի կառավարության, որում պահանջվում է 100 միլիոն դոլարի փոխհատուցում:
Նշենք, որ հայցն ուղարկվել է Մեծ Բրիտանիայի արդարադատության գերագույն դատարան (High Court of Justice): Իսրայելական կոնցեռնի պնդմամբ, վրացական կողմը, համաձայն 2007 թվականին կնքված պայմանագրի, զենքի առաքումների դիմաց իրեն պարտք է 100 միլիոն դոլար:
Քալանդաձեի խոսքերով, առայժմ հայտնի չէ, թե ինչ պարտքի և կոնկրետ որ գործարքի մասին է խոսք գնում. «Որքանով մեզ հայտնի է, այդ ընկերությունն արդեն դիմել է դատարան: Վերջինս էլ կվճռի, թե որքանով է արդարացի այդ ընկերությունը»:
Հիշեցնենք, որ ապրիլի 1-ին Թբիլիսիի դատարանը իսրայելցի գործարարներ Ռոնի Ֆուքսին և Զեև Ֆրենկելին մեղավոր ճանաչեց պաշտոնատար անձին կաշառելու փորձի համար:
Նրանք ձերբակալվել էին 2010 թվականի հոկտեմբերի 14-ին Բաթում քաղաքում և մեղադրվում էին Վրաստանի ֆինանսների փոխնախարար Ավթանդիլ Խարաիձեին 7 միլիոն դոլար կաշառք տալու մեջ:
Ֆուքսը դատապարտվեց 7 տարվա ազատազրկման և 500,000 վրացական լարի (295,000 ամերիկյան դոլար) տուգանքի, իսկ Զեև Ֆրենկելը` 6.5 տարի ազատազրկման ու 100,000 վրացական լարի (60,000 ամերիկյան դոլար) տուգանքի:
Սա հարուցել էր իսրայելական կողմի զայրույթը. Իսրայելի արտգործնախարար Ավիգդոր Լիբերմանը հայտարարել էր, որ դա հնարովի մեղադրանք է իր հայրենակիցների նկատմամբ:
Ապա հայտնի դարձավ, որ ապրիլի սկզբին Իսրայելը Վրաստանին ներառել է իր «սև ցուցակում»` իր քաղաքացիներին խորհուրդ տալով չայցելել Վրաստան:
Ինչ վերաբերում է սպառազինության արտադրությամբ ու արդիականացմամբ զբաղվող իսրայելական Elbit Systems ընկերությանը, ապա 2008 թվականի գարնանը ամերիկյան New York Times թերթին տված հարցազրույցում Վրաստանի նախագահ Միխեիլ Սաակաշվիլին նշել էր, որ իրենք այդ ընկերությունից գնել են Hermes 450 տիպի 40 անօդաչու թռչող սարք (հետախուզական ինքնաթիռ):
Բացի այդ, իսրայելական ընկերությունն արդիականացրել էր Վրաստանի զինված ուժերում առկա Т-72 տիպի տանկերը` դրանց վրա տեղադրելով կապի նոր միջոցներ, «յուրային-օտար» և այլ սարքեր, ինչպես նաև նոր զրահ:
