«Լեռնային Ղարաբաղում մայիսին անցկավելիք խորհրդարանական ընտրությունները ևս մեկ անգամ կնպաստեն Ղարաբաղի՝ որպես պետականության ամրապնդմանը»։ Նման տեսակետ «Առաջին լրատվական»-ի հետ զրույցում հայտնեց ռուս փորձագետ, REX գործակալության սյունակագիր Ստանիսլավ Տարասովը, ով նախորդ ընտրություններին Լեռնային Ղարաբաղում եղել է ընտրական հանձնաժողովի կազմում: Այս ընտրություններում Տարասովը հնարավոր է որպես հյուր այցելի Լեռնային Ղարաբաղ:
Նա ընդգծեց, որ մանրամասն ծանոթ չէ, թե որ կուսակցություններն են կոնկրետ առաջադրվել և ինչ նախընտրական ծրագրեր ունեն, բայց վստահեցրեց, որ այս ընտրությունները կնպաստեն Լեռնային Ղարաբաղի որպես պետություն ծաղկմանը և ժողովրդավարացմանը. «Ղարաբաղում սրանք առաջին ընտրությունները չեն և ամեն ընտրությունից հետո ավելի է լեգիտիմացվում աշխարհում, դա փաստ է: Ընդհանուր առմամբ նշեմ, որ Լեռնային Ղարաբաղը հիմա միայնակ չէ այս կարգավիճակով: Կա Հարավային Օսիա, Աբխազիա, Մերձդնեստր, հիմա կա դեռևս չճանաչված Դոնեցկի և Լուգանսկի հանրապետությունները, որտեղ ևս ընտրություններ են անցկացվում . այնտեղ փորձ է արվում Կիևի միջոցով անցկացվելու, բայց մյուս կողմից էլ կարծես փորձում են ներքին ընտրություններ անցկացնել»,-ասաց նա:
Տարասովի խոսքերով՝ միջազգային հանրությունը ընդունում և հաշվի է առնում ռեալ իշխանության կարծիքը և Լեռնային Ղարաբաղի ընտրություններն էլ բացառություն չեն.« Իսկ ռեալ իշխանությունը Ղարաբաղում այն իշխանությունն է, որն ընտրված է լինում: Այն ուժերը, որոնք ինչ որ ձևով ուզում են լուծել Ղարաբաղյան հակամարտությունը՝ նրանք սիտիպված կլինեն վաղ թե ուշ ռեալ իշխանության հետ կոնտակտի մեջ մտնել: Ով կհաղթի այս և հաջորդիվ նախագահական ընտրություններում՝ նա էլ կլինի իրական իշխանությունը»:
Ինչ վերաբերվում է նախորդ ընտրություններին, որին ներկա է եղել նաև մեր զրուցակիցը, ապա իր խոսքերով՝ մեծ ոգևորություն է ապրել, երբ տեսել է, թե ինչպես են ղարաբաղցիները գալիս, քվեարկում և ընտրությունների հետ հույսեր ապրում․«Ես ոչ մի հիմք չունեմ, որ հիմա հայտարարեմ, թե այդ ընտրությունները ժողովրդավարության հաստատմանը չեն նպաստելու կամ որ դրանք կեղծվելու են, համենայնդեպս, ներկա են լինելու դիտորդներ: Այս ընտրություններն իսկապես կարևոր են Ղարաբաղի համար»,-եզրափակեց նա:
