Գիտնականները լիովին ապակոդավորել են արևելյան լեռնային գորիլայի գենոմը, այն համեմատել են այդ պրիմատների 3 մնացած ենթատեսակների ԴՆԹ-ի հետ ու պարզել, որ արևելյան գորիլաներին գենետիկ դեգրադացիա է սպասվում: Հետազոտողների աշխատանքի մասին պատմող հոդվածը հրապարակված է Science ամսագրում:
Գենետիկների միջազգային խումբը՝ Յալի Սյուեի գլխավորությամբ, Սենգերի ինստիտուտից, ուսումնասիրել է արևելյան գորիլաների 13 ներկայացուցչի ԴՆԹ-ները և ապակոդավորել է նրանց գենոմը: Աշխատանքի ընթացքում վերլուծության է ենթարկվել 11 743 407 միանուկլեոտիդ պոլիմորֆիզմ: Աշխատանքի արդյունքները ցույց են տվել, որ 20 000 տարի առաջ արևելյան գորիլաների ենթատեսակները դադարել են իրեր մեջ խաչասերվել, ինչի հետևանքով պոպուլյացիայի քանակը սկսել է կրճատվել, իսկ գենետիկ բազմազանությունները՝ նվազել:
Ինչ վերաբերում է արևելյան լեռնային գորիլաներին՝ ինբրիդինգի պատճառով ներկայումս նրանց գեների մինչև 34%-ը հոմոզիգոտային են՝ մորից ու հորից ստացած գեների ճյուղերը նույնն են:
Ըստ գիտնականների՝ գենետիկ դեգրադացիան ամենից առաջ ազդում է պրիմատների իմունային համակարգի վրա և վատացնում է դրա վիճակը: Հետազոտողները վստահ են, որ իրենց աշխատանքի արդյունքները կենսաբաններին թույլ կտան նոր ռազմավարություններ մշակել արևելյան լեռնային գորիլաների պոպուլյացիայի պահպանման համար:
Գորիլաների ընտանիքը ներառում է 2 տեսակ՝ արևմտյան և արևելյան գորիալաներ, և 4 ենթատեսակ՝ արևմտյան գետային գորիլաներ, արևմտյան և արևելյան հարթավայրային գորիլաներ և արևելյան լեռնային գորիլաներ: Ներկայումս աշխարհում հաշվվում է վերջին ենթատեսակի մոտ 800 առանձնյակ՝ միավորված երկու պոպուլյացիայում: Նրանցից մեկն ապրում է Վիրունգի Վիրունգա հրաբխային լեռներում Ռուանդայի, Ուգանդայի և Կոնգոյի սահմաններին, երկրորդը՝ Բվինդի անանցանելի անտառ ազգային պարկում՝ Ուգանդայի հարավարևմտյան մասում:
