Լոնդոնից 50 կմ հեռու՝ Գաթվիք օդանավակայանից ոչ հեռու, զգալի պաշարով նավթահանք է հայտնաբերվել: Այս մասին հայտնում է RIA Novosti-ն՝ հղում անելով UK Oil and Gas Investments (UKOG) ընկերությանը:
Ընկերության տեղեկությամբ՝ այդ հանքավայրում նավթի մոտավոր պաշարը կարող է կազմել մոտ 100 մլրդ բարել, սակայն կարող է դուրս բերվել միայն փոքր մասը:
Այդ տարածքում հորատումը սկսվել է անցած տարի: UKOG-ի տվյալներով՝ նավթի մեծ մասը 762 և 914 մ խորության վրա է:
Փորձագետները, համեմատելով ԱՄՆ-ում և Արևմտյան Սիբիրում երկրաբանության նմանության հետ, ենթադրել են, որ կարող է դուրս բերվել պաշարների միայն 3%-15%-ը:
UKOG-ի գործադիր տնօրեն Սթիվեն Սանդերսոնի խոսքով՝ վերջին 30 տարում Մեծ Բրիտանիայում ցամաքում կատարված «այդ բացահայտումը, հնարավոր է, ամենանշանակալին է» և «ունի ազգային մեծ նշանակություն»:
