Ամեն ինչ տանում է ըմբոստության նոր ալիքի, որը կսրբի-կտանի ՀՀ երեք նախագահներին: «Առաջին լրատվական»-ի հետ զրույցում այս մասին ասաց «Նոր ժամանակներ» կուսակցության ղեկավար, քաղաքական գործիչ Արամ Կարապետյանը՝ անդրադառնալով երկրում ստեղծված նախընտրական իրողություններին:
Արամ Կարապետյանի համոզմամբ՝ գալիք նախագահական ընտրությունները լինելու են ՀՀ երեք նախագահների վերջին ընտրությունը. եթե իշխանությունները հասնեն իրենց «մուրազին», ամեն ինչ կվերջանա:
«Ցավում եմ, որ ավելի շատ խեղկատակություն է, քան ընտրություն: Այդ պատճառով էլ կարծում եմ՝ սա երեք նախագահների փակվող էտապն է: Իմ տպավորությամբ՝ Սերժ Սարգսյանը կփորձի գրել իրեն այն տոկոսները, որոնք պետք են՝ ոչնչի հետ հաշվի չնստելով: Ես կարծում եմ, որ բավականաչափ դաժան թվեր կգրի իրեն, այսինքն՝ կխփի այնքան, ինչքան պետք է: Դրանից հետո ծանր կացության մեջ կհայտնվի, որովհետև լեգիտիմությունը կասկածի տակ կառնվեն գերտերությունների կողմից:
Դրանից հետո կսկսվի մի իրավիճակ, որին Սերժ Սարգսյանը կկարողանա գտնել լուծումներ, որը շատ բարդ է լինելու, նոր ալիք կբարձրանա և կսրբի իր ամբողջ էտապը: Մի էտապը կավարտվի, մյուսը կսկսվի: Դաշտում այսօր իրավիճակը լրիվ լճացած է, ճահիճ: Այս էտապն ավարտվում է, մյուսը սկսվում»,- ասաց Արամ Կարապետյանը:
ՆԺԿ ղեկավարի կարծիքով՝ ամեն ինչ տանելու է դեպի ըմբոստության նոր ալիքի: Նրա խոսքով՝ պարտադիրչէ, որ դա հենց հետընտրական լինի. դժգոհությունը, կուտակված էներգիան ինչ-որ տեղ դուրս կգա:
Եզրափակելով իր խոսքը՝ Արամ Կարապետյանն ասաց, որ նախկին նախագահները միգուցե ցանկություն ունենան վերադառնալու, բայց հարց է՝ դա կհաջողվի՞ նրանց, թե՞ ոչ: Քաղաքական գործչի համոզմամբ՝ չի հաջողվի:
