ԱՄՆ-ի նախագահ Բարաք Օբաման հայտարարել է արագ իմիգրացիոն բարեփոխումներ անցկացնելու անհրաժեշտության մասին։ Մանուկ հասակում ԱՄՆ եկած ներգաղթյաներին հնարավորություն կտրվի ստանալ ամերիկյան անձնագրեր,- հաղորդում է RIA Novosti-ն:
«Մենք արդեն հիմա պետք է աշխատենք լայնածաված իմիգրացիոն բարեփոխման վրա: Սակայն եթե ընտրությունները և քաղաքականությունը Կոնգրեսին շեղում են լայնածավալ ծրագիր մշակելուց, եկեք գոնե պայմանավորվենք՝ դադարեցնել արտաքսել պատասխանատու երիտասարդ մարդկանց, որոնք ցանկանում են աշխատել մեր լաբորատորիաներում, սկսել նոր բիզնես և պաշտպանել մեր երկիրը: Ուղարկե՛ք ինձ օրինագիծ, որը նրանց հնարավորություն կտա վաստակել քաղաքացիություն, և ես անմիջապես կստորագրեմ այն»,-ասել է նախագահը Կոնգեսին ուղղված ուղերձում:
ԱՄՆ-ի վարչակազմն անարդյունավետ է համարում արտաքսել 11 միլիոն անօրինական ներգաղթյալներին, որոնք ներկայումս գտնվում են երկրի տարածքում: Վարչակազմի առաջարկած բարեփոխման խնդիրն է ստիպել անօրինական ներգաղթյալներին դուրս գալ ստվերից և դառնալ երկրի պարկեշտ բնակիչ:
Հաղորդագրության մեջ նշվում է, թե նրանք պետք է վստահ լինեն, որ եթե անցնեն բոլոր ստուգումները, ցուցադրեն լեզվի իմացություն, վճարեն հարկերը, կկարողանան ստանալ ամերիկյան անձնագիր:
Բարեփոխումը նաև առաջարկում է շարունակել պայքարը միջազգային հանցագործության դեմ, ամրապնդել ամերիկյան իրավապահ մարմինների համագործակցությունն օտարերկրյա գործընկերների հետ, պայքարել անձնագրերի և վիզաների կեղծման դեմ, արտաքսել հանցագործներին և կատարելագործել միգրացիայի հետ կապված ամերիկյան դատական համակարգի աշխատանքը:
