Թուրքիայի նախագահ Ռեջեփ Թայիփ Էրդողանը ստորագրել է ներքին անվտանգության մասին օրենքը: Այն ուժի մեջ է մտել շաբաթ օրը` պաշտոնական Resmi Gazete պարբերականում հրապարակվելուց հետո:
Օրենքը մշակվել է կառավարության նախաձեռնությամբ` 2014-ի հոկտեմբերին Թուրքիայում քրդական ազգաբնակչության զանգվածային բողոքի ակցիաներից հետո: Համաձայն օրենքի` ոստիկանությունն ավելի մեծ լիազորություններ է ստացել փողոցային անկարգությունների դեպքում, իսկ դրանց մասնակիցներն առավել խիստ պատասխանատվություն կկրեն օրենքի առջև:
Մասնավորապես`օրենքը նախատեսում է մինչև 5 տարվա ազատազրկում այն ցուցարարների համար, որոնք մասնակիորեն կամ ամբողջությամբ փակում են իրենց դեմքը բողոքի ակցիայի ժամանակ: Այրող հեղուկով շշերի, ֆրեյվերքների, երկաթե գնդերի և այլ նմանատիպ սարքավորումների օգտագործումը զենքին հավասարազոր կհամարվի, իսկ ոստիկանությունը կկարողանա դրանք կիրառող անձանց դեմ զենք օգտագործել:
Ոստիկանությունն իրավունք է ստանում ներկաջրով ջրցաններ օգտագործել` ապօրինի, չթույլատրված հանրահավաքներն ու ցույցերը ցրելու համար, ինչպես նաև 48 ժամով ձերբակալել անկարգություններին մասնակիցներին:
