Մեծ Բրիտանիայի բնակչուհի Քիմ Լիթոնը ծննդաբերել է հենց փողոցում, ավելին նրան նկարահանել են փողոցի հսկիչ տեսախցիկները, հաղորդում է Daily Mail-ը:
25-ամյա հղի կինը միայնակ չի եղել, նրան ուղեկցել է 54-ամյա մայրը: Կինը ծննդաբերել է «Էդեն» առևտրի կենտրոնի մոտ: Կնոջն օգնություն են ցուցաբերել առևտրի սրահի անվտանգության աշխատակիցները: Այս ամենը տեղի է ունեցել կնոջ 4-ամյա որդու աչքի առաջ:
Մայրն աղջկան անվանել է Լին Էդեն՝ ի պատիվ առևտրի սրահի: Քիմը խոստովանել է, որ մտադիր է տեսախցիկների ձայնագրությունը ցույց տալ աղջկան, երբ վերջինս կմեծանա:
Քիմի մայրը նշել է, որ իր աղջկա բախտը բերել է, քանի որ առաջին երեխայի ծննդից հետո բժիշկները նրա մոտ հայտնաբերել էին գինեկոլոգիական բնույթի խնդիրներ և խորհուրդ չեն տվել նրան երկրորդ անգամ երեխա ունենալ: Սակայն փոքրիկ Լինը լիովին առողջ է ծնվել: Հիվանդանոցում մայրն ու աղջիկն ընդամենը հինգ ժամ են անցկացրել, որից հետո գնացել են տուն:
