Ադրբեջանի կառավարությունը պետք է անհապաղ դադարեցնի ահաբեկման արշավը գրող Ակրամ Այլիսլիի նկատմամբ՝ հայտարարել է Human Rights Watch իրավապաշտպան կազմակերպությունը: Այս մասին հայտնում է Contact.az-ը:
Արտասահմանյան կառավարություններն ու միջկառավարական կազմակերպությունները, որոնց անդամակցում է Ադրբեջանը, պետք է հանդես գան ընդդեմ այդ արշավի և կոչ անեն իշխանություններին անհապաղ հետաքննել գրողի հասցեին ուղղված սպառնալիքները և հարգեն ազատ կամարտահայտումը:
«Ադրբեջանի իշխանությունները պարտավոր են պաշտպանել Ակրամ Այլիսլիին, սակայն դրա փոխարեն նրանք ահաբեկում են նրան»,- նշել է Հյու Ուիլյամսոնը, որը կազմակերպության՝ Եվրոպայի և Կենտրոնական Ասիայի հարցերով տնօրենն է:
Փետրվարի 11-ին «Ժամանակակից Մուսավաթ» կառավարամետ կուսակցության առաջնորդ Հաֆիզ Գաջիևը հրապարակավ հայտարարել էր, որ 10 հազար մանաթ կվճարի նրան, ով կկտրի Այլիսլիի ականջը:
«Ադրբեջանի իշխանությունները պետք է անհապաղ հետաքննեն և պատասխանատվության ենթարկեն Սյլիսլիի հասցեին սպառնալիքների հնչեցման համար պատասխանատու անձանց և ապահովեն նրա անձնական անվտանգությունը: Ադրբեջանի կառավարությունը անտեսում է ազատ կամարտահայտման ապահովման մասին իր միջազգային պարտավորությունները: Սա ցնցող է, հատկապես այն բանից հետո, երբ ադրբեջանցի պաշտոնյաները հավաքվել էին Ստրասբուրգում՝ գովազդելու երկրում մարդու իրավունքների վիճակը»,- ասել է Ուիլյամսոնը:
Այս իրադարձությունների ֆոնին Այլիսլիի կնոջն ու որդուն աշխատանքից հեռացրել են: