Վրաստանի, Ադրբեջանի և Թուրքիայի միջև համագործակցությունն ուղղված է տարածաշրջանում կայունության և խաղաղության ամրապնդմանը, ոչ թե որևէ մեկի դեմ: «Գրուզիա Օնլայն»-ի հաղորդմամբ՝ այս մասին Վրաստանի պաշտպանության նախարար Մինդիա Ջանելիձեն հայտարարել է մամլո ասուլիսում, որն անցկացվել է 3 երկրների պաշտպանական գերատեսչությունների ղեկավարների եռակողմ հանդիպումից հետո:
Ջանելիձեն նշել է, որ ինքը շատ արդյունավետ և բովանդակալից հանդիպում է ունեցել թուրք և ադրբեջանցի գործընկերների հետ:
Նրա խոսքով՝ եռակողմ ձևաչափով համագործակցությունը սկսվել է 2012թ., և 3 երկրների պաշտպանության նախարարները միմյանց հետ հանդիպում են տարեկան 2 անգամ:
«Համագործակցության նոր ձևաչափեր ենք ծրագրում: Ցանկանում եմ հաճույքով նշել, որ ընթացիկ տարվա գրաֆիկը լի է հետաքրքիր միջոցառումներով: Դա վերաբերում է ռազմական կրթության ոլորտին, ավանդաբար եռակողմ ձևաչափով անցկացվող համատեղ զորավարժություններին, ինչպես նաև պաշտպանական ոլորտում համագործակցության առանձին ուղղություններին, ինչը դինամիկ կերպով զարգանում է, ինչի համար ուզում եմ շնորհակալություն հայտնել իմ գործընկերներին և բարեկամ պետությունների իշխանություններին»,- հայտարարել է Ջանելիձեն:
«Միանշանակ ֆիքսում եմ, որ մեր համագործակցությունն ուղղված է տարածաշրջանում կայունության և խաղաղության ամրապնդմանը, ոչ թե որևէ մեկի դեմ: Այն ուղղված է մեր երկրների զինված ուժերի հնարավորությունների զարգացմանը: Ուզում եմ նշել, որ մեր երկրների հետևողական և դինամիկ զարգացման գլխավոր նախադրյալները տարածաշրջանում խաղաղությունն ու կայունությունն են»,- նշել է Ջանելիձեն:
