Երգահաններ Ռուբեն Հախվերդյանն ու Դավիթ Ամալյանը այսօր հրավիրված մամուլի ասուլիսի ժամանակ հարկ չհամարեցին խոսել «Տաշիր» մրցանակաբաշխությունից և, առհասարակ, շոու-բիզնեսից: Հախվելդյանը չի դիտել «Տաշիրը», քանի որ իր խոսքով` «նայելու բան չի»: «Եթե Հասմիկ Պողոսյանն է մշակույթի նախարարը, շոու-բիզնեսը սենց «կծաղկի»: Եթե կրթության և գիտության նախարարը Ֆանտոմասն է՝ այսպես պիտի լինի»,- ասում է Ռուբեն Հախվերդյանը:
Դավիթ Ամալյանի ելքը տեսնում է մշակութային հեղափոխության մեջ: Ըստ նրա` պետք է ստեղծվի Գեղխորհուրդ, որի ցենզով անցած երգերն ու տեսահոլովակները միայն պետք է ցուցադրվեն: «Հոգևոր սնունդ են փչացնում: Պետք է ակունքը փնտրել: Բոլոր հեռուստատեսություններով նույն երգիչներն են: Ինչո՞ւ իրական մտավորականներին ցույց չեն տալիս: Բացի ազգային հերոսներից, որևէ մեկի անունը հանրությանը հայտնի չէ»,- ասում է Դավիթ Ամալյանը:
Ռուբեն Հախվերդյանին ևս մտահոգում է, որ գաղափարական հերոսները չեն երևում էկրաններին: «Պետք չէ խոսել հայրենասիրությունից, ուղղակի պետք է ցույց տալ Լեոնիդ Ազգալդյանի, Դուշման Վարդանի, Մոնեթ Մելքոնյանի նկարները, որ մեր երեխաները ներշնչվեն այդ մարդկանցով»,- ասում է Հախվերդյանը:
Հախվերդյանը պատահականություն չի համարում այն, որ հենց գաղափարական հերոսները զոհվեցին պատերազմում`դա համարելով հնարավոր ռուսական դավադրության արդյունք: «Եթե նրանք կենդանի լինեին, կպայքարեն էս խայտառակ վիճակի դեմ՝ ինչպես Ժիրայր Սեֆիլյանն է դժգոհում»,- համոզված է Հախվերդյանը:
