Ուկրաինայի գլխավոր դատախազությունը հրաժարվել է Վրաստանին արտահանձնել այդ երկրի նախկին նախագահ Միխեիլ Սաակաշվիլիին: Այս մասին հաղորդում է BBC-ն՝ վկայակոչելով գերատեսչության մամուլի ծառայությունը:
«Ստուգումների արդյունքում Ուկրաինայի Գլխավոր դատախազութունը եկել է այն եզրակացության, որ գոյություն ունեն որոշակի ռիսկեր առ այն, որ Վրաստանի համապատասխան մարմինների կողմից Սաակաշվիլիին արտահանձնելու հայցն արվել է քաղաքական շարժառիթներով նրան հետապնդելու նպատակով»,- ասվում է հաղորդագրության մեջ:
Հաղորդագրության մեջ նաև նշվում է, որ Սաակաշվիլիի արտահաձնումը կհակասեր 1950թ. ընդունված Մարդու իրավունքների և հիմնական ազատությունների պաշտպանության կոնվենցիայի պահանջներին:
Հիշեցնենք, փետրվարի 17-ին Վրաստանի գլխավոր դատախազությունը դիմեց Ուկրաինայի իշխանություններին՝ հետախուզության մեջ գտնվող անձանց, մասնավորապես Միխեիլ Սաակաշվիլիին արտահանձնելու խնդրանքով:
Սաակաշվիլիից բացի՝ Թբիլիսին պահանջում է հանձնել նաև նախկին արդարադատության նախարար Զուրաբ Ադեիշվիլիին: Վրաստանի դատախազությունն ընդգծում է, որ Ադեիշվիլին հետախուզվում է Ինտերպոլի կողմից:
Նշենք, որ փետրվարի 14-ից Ուկրաինայի նախագահ Պյոտր Պորոշենկոյի հրամանով Սաակաշվիլին զբաղեցնում է նրա արտաքին հարցերով խորհրդականի պաշտոնը:
