Վրաստանի արտաքին գործերի նախարար Մայա Պանջիկիձեն Սահմանադրության մեջ արտաքին քաղաքականության ուղղությունների ամրագրումն ընդունելի է համարում: Այդ մասին նա հայտարարել է Լատվիայի Սեյմի պատվիրակության հետ հանդիպումից հետո լրագրողներին տված հարցազրույցում:
«Վրաստանի եվրոպական ընտրությունը վրաց ժողովրդի ընտրությունն է: Ես սահմանադրական իրավունքի մասնագետ չեմ, և իմ իրավասությունների շրջանակում է ասել, թե ինչ է հնարավոր ընդգրկել Սահմանադրությունում, և ինչը՝ ոչ: Սակայն վրաց ժողովրդի եվրոպական ընտրությունը, որում ոչ ոք կասկածներ չունի, իմ կարծիքով, կարող է ամրագրվել Սահմանադրությամբ: Չնայած՝ մեկ անգամ ևս նշում եմ, որ ես մասնագետ չեմ և չեմ կարող ինձ վրա ավելին վերցնել»,- ասել է Պանջիկիձեն:
Նախարարը նաև մեկնաբանել է Վրաստանի արտաքին քաղաքականության ուղղությունների վերաբերյալ դաշինքների միջև ձեռք բերված համաձայնությունը, որը առաջարկվել է խորհրդարանի արտաքին կապերի հանձնաժողովի նախագահ Տեդո Ջափարիձեի կողմից` նշելով, որ այն բավականին հետաքրքիր փաստաթուղթ է, որը ենթակա է քննարկման:
«Կարծում եմ, որ այդ 14 կետերը ներառում են այն ամենն, ինչ հարկավոր է մեր երկրին: Եթե «Ազգային շարժումը» ցանկանում է քաղաքական կուսակցությունների խաղաղ գոյակցություն, ապա հնարավոր է աշխատել և քննարկել ցանկացած փաստաթուղթ: Դա քաղաքական կուլտուրա է, որը մենք պետք է ներդնենք, և հույս ունեմ, որ այդ փաստաթղթի շուրջ աշխատանքները կկայանան»,- ասել է Մայա Պանջիկիձեն:
Խորհրդարանական մեծամասնությունը դաշինքներին առաջարկում է արտաքին քաղաքականության ուղղությունների 14 կետից բաղկացած համաձայնագիր: Տեդո Ջափարիձեն արդեն այն ուղարկել է բոլոր դաշինքներին, այդ թվում և՝ փոքրամասնությանը: Փաստաթուղթը կոչվում է «Վրաստանի արտաքին քաղաքականության ուղղությունների վերաբերյալ խորհրդարանական դաշինքների համաձայնագիր»:
