Եգիպտոսի նախկին նախագահ Հոսնի Մուբարաքը հարցաքննության է կանչվել զանգվածային անկարգությունների փաստով հարուցված քրեական գործի շրջանակներում ցուցմունքներ տալու համար: Այս մասին հաղորդում է France Presse գործակալությունը:
Բացի այդ, նրա որդիներին հրավիրել են հարցաքննության կաշառակերության փաստով հարուցված քրեական գործով: Ենթադրվում է, որ հարցաքննությունների այս շարքը սկսվել է Թահրիր հրապարակում տեղի ունեցող բողոքի ակցիաների դրդմամբ, որտեղ ցուցարարները պահանջում են անհապաղ պատասխանատվության ենթարկել ինչպես Մուբարաքին ու նրա ընտանիքի անդամներին, այնպես էլ ռեժիմի բոլոր ներկայացուցիչներին, այդ թվում՝ նախարարներին, դատավորներին, դատախազներին:
Բացի այդ, երեկ դատախազի սանկցիայով ձերբակալվել է Մուբարաքի կառավարության նախկին ղեկավար Ահմեդ Նազիֆը, որին նույնպես մեղադրում են կաշառակերության մեջ: Նրա կալանքի համար 15-օրյա ժամկետ է սահմանվել:
Երեկ նաև հայտնի է դարձել, որ բռնագրավվել են սաուդյան միլիարդատեր, արքայազն Վալիդ բեն Թալալի` երկրի հարավում գտնվող հողատարածքները: Երեկ այս մասին հայտարարել է Եգիպտոսի գլխավոր դատախազ Աբդ Ալ-Մագիդ Մահմուսը: Ըստ որոշ տեղեկությունների` այս գործարքը չեղյալ հայտարարելը կապված է Մուբարաքի ընտանիքի դեմ հարուցված քերական գործի հետ:
