Սենտ Լուիսի համալսարանի մասնագետներն ուսումնասիրել են բաժանումներն ու նոր հարաբերությունների սկիզբը: Նրանք պարզել են, որ ուղեղում մեխանիզմ է գործում, որն օգնում է դիմակայել բաժանմանը և մարդուն տրամադրում է նոր հարաբերությունների:
Ուսումնասիրությունը ցույց է տվել նաև, որ տղամարդիկ և կանայք որոշում են զուգընկերոջից բաժանվել տարբեր պատճառներով, գրում է The Hindustan Times-ը: Այսպես` ուժեղ սեռի ներկայացուցիչները հաճախ են իրենց զուգընկերուհիներից բաժանվում, եթե նրանք ուրիշի հետ սեռական կապ են ունեցել: Էվոլյուցիայի տեսանկյունից՝ այս փաստը կարելի է բացատրել նրանով, որ տղամարդը պետք է խուսափի ուրիշի ժառանգներին դաստիարակելուց: Իրենց հերթին, կանայք հաճախ են զուգընկերներից բաժանվում զգացմունքային դավաճանության պատճառով: Նրանք փորձում են հետագայում չկորցնել ռեսուրսները, ինչպիսիք են երեխայի դաստիարակության հարցում օգնությունը և ֆիզիկական պաշտպանությունը, որոնք առաջարկում է տղամարդը:
Սիրահարների մոտ ակտիվացած է ուղեղի այն հատվածը, որն ակտիվանում է կոկաինից կախվածություն ունեցողների մոտ: Ուղեղի այդ հատվածները պատասխանատու են հաճույքի համար: Բաժանությունը կարելի է համեմատել կոկաինի օգտագործումը դադարեցնելու հետ: Ուսումնասիրությունը ցույց է տվել, որ բաժանվելուց հետո, ինչպես նաև կոկաին այլևս չօգտագործելու ժամանակ ուղեղի որոշ հատվածներում մոխրագույն զանգվածն ավելանում է:
Դատելով ամեն ինչից՝ զուգընկերոջից բաժանվելուց հետո ուղեղում այնպիսի փոփոխություններ են տեղի ունենում, որոնք ստիպում են մարդուն առաջ շարժվել:
