Երեկ ընտրությունները երկշաբաթյա ժամկետով հետաձգելու համար ՍԴ դիմած ՀՀ նախագահի թեկնածու Պարույր Հայրիկյանը հայտարարել է, որ եթե առաջիկա 2 օրերի ընթացքում ընդդիմադիր թեկնածուների միավորումը կայանա, ապա ինքը պատրաստ է հետ վերցնել դիմումը։
Սահմանադրագետ Վարդան Այվազյանն «Առաջին լրատվական»-ի հետ զրույցում նշեց, որ ՍԴ դիմումի առարկան բացառապես մեկը պետք է լինի՝ խոչընդոտները ճանաչել անհաղթահարելի, և այդ հիմքով հետաձգել ընտրությունները, իսկ մնացածն, ըստ սահմանադրագետի, մանկապարտեզային անլուրջ հայտարարություններ են: Նրա խոսքերով՝ խնդիրը մեզանում այն է, որ ընդհանրապես և՛ հասարակության, և՛ քաղաքական գործիչների մակարդակն այնպիսին է, որ պրոցեսներն իրավական նորմերով չեն կարգավորվում: «Քանի որ մեր Սահմանադրությունն այդ խնդիրներին համապարփակ լուծում չի տալիս, ով ինչ ինքնաստեղծագործություն ասես մոգոնում է, իսկ Հայրիկյանի հայտարարությունը մանկապարտեզի մակարդակի հայտարարություն է, բայց իհարկե, վերջին խոսքը Սահմանադրական դատարանինն է»,- ասաց Վարդան Այվազյանը՝ հավելելով, որ մինչև ՍԴ-ի քննարկելը, նա կարող է հետ վերցնել իր դիմումը։ Ըստ նրա՝ այս տեսակ պայման դնելը քաղաքական տհասության դրսևորում է:
Նման պահանջները, ինչպես նաև Անդրիաս Ղուկասյանի հացադուլը, ըստ սահմանդրագետի, անտրամաբանական, հակասահմանադրական պահանջներ են, սա պայմանավորված է հասարակության ինքնագիտակցության մակարդակով, և «Սահմանադրությունը չպետք է նախատեսի ամեն մի անտրամաբանական, հիմար բան»:
«Պատկերացրեք իրավիճակ, երբ մեզ մոտ, հաշվի առնելով ժողովրդի մակարդակը, ԱԺ բազմաթիվ օրենքներ ընդունվեն՝ փողոցում թքելը արգելելու, բարձր խոսելն արգելելու, աղբը փողոց նետելն արգելելու մասին: Ելնելով քաղաքական կուսակցությունների, գործիչների մակարդակից՝ ոչ մի սահմանադրություն չի կարողանում մանկապարտեզային բաներ կարգավորի, որպեսզի իրենք նման վարքագիծ չդրսևորեն: Հայրիկյանն անբարոյական խաղ է խաղում, որովհետև Սահմանադրության 52-րդ և 100-րդ հոդվածներով՝ նրա կարգավիճակում՝ որպես նախագահի թեկնածուի, ՍԴ-ին բացառապես մեկ պահանջ ունի ներկայացնելու՝ ճանաչել անհաղթահարելի խոչընդոտներ՝ ելնելով իր առողջական վիճակից, բայց երբ ինքն առողջական վիճակը թողնում է մի կողմ ու ինչ-որ միավորման հարցեր է դնում, սա անլրջություն է, ավելին՝ եթե այս տեսակ պահանջներ ներակայացնի ՍԴ, ՍԴ-ն միանշանակ կմերժի նրա դիմումը, եթե անգամ ընդդիմադիրներն էլ չմիավորվեն», -ասաց նա:
Ըստ Վարդան Այվազյանի՝ եթե մարդը Սահմանադրությամբ իրավունք է ստանում, սա դեռ չի նշանակում, որ այդ իրավունքը պետք է շանտաժի միջոցով պարտադիր իրացնել: «Չի հասկանում՝ մարդու իրավունքը ինչ բան է, իրավունքը նրա համար չէ, որ խաղ անես, իրավունքը նրա համար է, որ այն օգտագործես, որ քո իրավունքը այլոց շահերը չոտնահարի, սա է խնդիրը, իսկ նման քաղաքական մանկապարտեզներն, իրոք, պատիվ չեն բերում մեր երկրին և ընդհանրապես քաղաքական գործընթացներին»:
Հարցին, թե արդյո՞ք ամեն կերպ փորձ է արվում վարկաբեկել ընտրական գործընթացը, սահմանադրագետը պատասխանեց, որ քանի որ մրցակցություն, ըստ էության, գոյություն չունի, այսինքն՝ անհավասարների միջև մրցակցություն է, փորձում են ինտրիգ մտնցնել այս գործընթացի մեջ, որ ցույց տան՝ տեսեք, մենք կանք, այսինքն՝ ինքնահաստատվելու խնդիր ունեն: «Զարմանալի է, որ լինելով քաղաքական գործիչներ՝ մինչև հիմա չեն ինքնահաստատվել և դրանով փորձում են ինքնահաստատվել, բայց այս ճանապարհով իրենք իրենց ծաղրուծանակի են ենթարկում և ոչ թե ինքնահաստատվում են»,- նշեց սահմանադրագետը:
