Պաշտոնական այցով Իտալիայում գտնվող Թուրքիայի՝ Եվրամիության հարցերով նախարար Վոլքան Բոզքըրը, մեկնաբանելով Եվրախորհրդարանի կողմից ապրիլի 15-ին Հայոց ցեղասպանության վերաբերյալ քննարկվելիք որոշումը, հայտարարել է, որ «Հայոց ցեղասպանության մասին բանաձևի» ընդունումը ոչ այլ ինչ է լինելու, քան պարզապես թղթի կտոր։ Այս մասին հայտնում է BBC-ի թուրքական բաժինը։
«Սխալ ենք համարում, երբ նման որոշումներ են կայացնում ոչ թե պատմաբանները, այլ խորհրդարաններում նստած քաղաքական գործիչները։ Եվրախորհրդարանի՝ ապրիլի 15-ի օրակարգում լինելու են 1915 թվականի իրադարձությունները։
Հավատում եմ, որ այդ որոշումը քննարկելիս կառաջնորդվեն ոչ թե զգացմունքներով, այլ գիտակցությամբ։ Հակառակ դեպքում՝ բանաձևի ընդունումը ոչ այլ ինչ է լինելու, քան պարզապես թղթի կտոր։ Եթե նման որոշում կայացվի, ապա այդ մասին Թուրքիան տեղեկացվելու է Բրյուսելում մեր մշտական ներկայացուցչի միջոցով, և նույն օրը նույն ձևով հետ ենք ուղարկելու այն։ Այդ բանաձը որևէ ուժ և ազդեցություն չի ունենալու», – ասել է թուրք նախարարը։
Հիշեցնենք, որ Եվրոպական խորհրդարանը մարտի 12-ին ընունել է «Մարդու իրավունքները և ժողովրդավարությունն աշխարհում» ամենամյա զեկույցը, որում ԵՄ անդամ երկրներին կոչ է արել ճանաչել Հայոց ցեղասպանությունը:
