Այսօր «Հանդելսբլատ» թերթին տված հարցազրույցում Եվրոպական կենտրոնական բանկի անդամ Յորգ Ասմուսենն ասել է, որ Կիպրոսին օգնելու ծրագիրը պետք է պատրաստ լինի ընթացիկ տարվա մարտի վերջին:
Նա նշել է, որ ստեղծված իրավիճակում Կիպրոսի համար միակ ելքն արտաքին ֆինանսական աջակցությունն է: Նա հայտարարել է, որ առանց այդ օգնության երկիրը կկանգնի ֆինանսական սնանկության առաջ: Պատասխանելով այն հարցին, թե հնարավոր է Կիպրոսի պարտքերի մաս-մաս փրկություն, Ասմուսենն ասել է, որ հարկավոր է քննարկել հնարավոր բոլոր տարբերակները և կշռադատել դրանց բոլոր թերություններն ու առավելությունները: Կիպրոսի իշխանությունները պայմանականորեն նոյեմբերի վերջին միջազգային վարկատուների «եռյակի»` Եվրոպական հանձնաժողովի, Եվրոպական կենտրոնական բանկի և Արժույթի միջազգային հիմնադրամի հետ համաձայնեցրել էին 17,5 մլրդ եվրոյի տրամադրումը: Սակայն Կիպրոսի ԵՄ գործընկերները հարցի վերջնական որոշման կայացումը մի շարք խնդիրների պատճառով, հիմնականում՝ պարտքի մարման հնարավորության հետ կապված, անորոշ ժամանակով հետաձգեցին:
Բացի դա, Գերմանիայում և ԵՄ այլ երկրներում հանկարծակի կասկածներ են առաջ եկել Կիպրոսի` փողերի լվացման կենտրոն լինելու հարցում, ինչը իշխանությունները կտրականապես հերքել են` հղում կատարելով միջազգային և եվրոպական այնպիսի կազմակերպությունների գնահատականների վրա, որոնք զբաղվում են փողերի լվացման հարցերով: Սակայն գերմանացի քաղաքական գործիչները՝ թե՛ կառավարող, թե՛ ընդդիմադիր, պահանջում են կիպրական բանկային համակարգի խնդրի լուծման թափանցիկություն, հակառակ դեպքում Բունդեսթագը Նիկոսիային օգնություն տրամադրելու փաթեթին կողմ չի քվեարկի: Փորձագետները նման մեղադրանքները համարում են քաղաքականացված` հաշվի առնելով Բունդեսթագում սեպտեմբերին կայանալիք ընտրությունները:
Սրա հետ կապված՝ Ասմուսենը հայտարարել է, որ եթե կարծում են, որ Կիպրոսին օգնելու ծրագրի հաստատումը հետաձգվելու է մինչև սեպտեմբերին Գերմանիայում կայանալիք Բունդեսթագի ընտրությունները, ապա նման բան անհնար է:
