Ֆրանսիայում կործանված Airbus А-320 ինքնաթիռի երկրորդ օդաչուի գործողությունները կարելի է որակել որպես օդանավը ոչնչացնելումտադրություն: TASS-ի հաղորդմամբ՝ այս մասին հատուկ մամլո ասուլիսի ժամանակ հայտնել է Մարսելի դատախազ Բրիս Ռոբենը:
Նրա խոսքով՝ երկորրդ օդաչուն՝ 28-ամյա Անդրեաս Լյուբիթցը, կանխամտածաված խցիկի դուռը չի բացել Airbus А-320 ինքնաթիռի հրամանատարի առաջ և գիտակցաբար սկսել է իջեցնել ինքնաթիռը: «Դա վարկած է, որը մեզ առավել հավանական է թվում հետաքննության այս փուլում»,- հայտարարել է Մարսելի դատախազը:
Ռոբենի խոսքով՝ թռիչքի առաջին 20 րոպեներին երկու օդաչուները նորմալ շփվել են: Երբ ինքնաթիռի հրամանատարը դուրս է եկել խցիկից, հավանաբար, զուգարան գնալու, երկրորդ օդաչուն փակել է դուռն ու ինքնակամ իջեցրել ինքնաթիռը:
Հրամանատարը փորձել է վերադառնալ խցիկ, սակայն չի կարողացել: «Դուռը կարող էր փակված լինել միայն դիտավորյալ»,- ասել է դատախազը:
Ռոբենը հայտնել է, որ սև արկղից հանած ձայնագրության մեջ լսվում են դուռը կոտրելու ձայներ, դիսպետչերի կանչեր, ինչպես նաև բախման հնարավորության մասին ինքնաթիռի համակարգերի նախազգուշական ձայները: Երկրորդ օդաչուն ոչինչ չի պատասխանել, միաժամանակ, նրա բնականոն շնչառությունը լսելի է ընդհուպ մինչև աղետի պահը:
Մարսելի դատախազը նշել է, որ կործանված ինքնաթիռի ուղևորները մինչև վերջին վայրկյանները չեն գիտակցել, թե ինչ է կատարվում: «Գոռոցները սկսվել են ընկնելուց անմիջապես առաջ, ամենավերջին պահերին»,- ասել է Ռոբենը:
Paris Match պարբերականն իր թվիթերյան էջում հրապարակել է Անդրեաս Լյուբիթցի լուսանկարը:
Associated Press-ը, հղում անելով Անդրեաս Լյուբիթցին ճանաչած Փիթեր Ռուքերին, հայտնում է, որ նա ընկճախտի մեջ չի եղել:
«Նա երջանիկ էր, աշխատում էր Germanwings-ում, նրա մոտ ամեն ինչ լավ էր: Նա լավ տպավորություն էր թողնում»,- պատմել է Ռուքերը:
Հիշեցնենք, որ Բարսելոնից Դյուսերդորֆ թռչող Germanwings ավիաընկերության մարդատար A320 ինքնաթիռը մարտի 24-ին կործանվել է Ֆրանսիայի հարավում: Ինքնաթիռում 150 մարդ է եղել, բոլորը զոհվել են:
