«Մի շարք հարցեր կային, որոնք կուզենայինք կառավարությանը տալ, բայց մեզ հարց տալու հերթ չհասավ: Այս պահի դրությամբ մեր հարցերը գրավոր ներկայացնում ենք, հաջորդ քառօրյայի ժամանակ էլ հերթագրվելու ենք, հարց ենք բարձրացնելու: Մեր առաջիկա գործունեության ընթացքում ինքներդ կտեսնեք մեր կեցվածքը: Չեմ կարծում, որ կառավարությունն այդպես հեշտ կարողանալու է մեր հարցերին պատասխանել»,- այսօր լրագրողների հետ զրույցում ասաց «Բարգավաճ Հայաստան» խմբակցության քարտուղար Վահե Էնֆիաջյանը՝ պատասխանելով հարցին, թե չորեքշաբթի օրը կառավարության հետ հարցուպատասխանի ժամանակ ինչո՞ւ իրենք որևէ հարց չբարձրացրին:
Շուտով կլրանա այս կառավարության գործունեության մեկամյակը: Արդյոք ԲՀԿ-ն գնահատական կտա՞ այդ ընթացքին՝ հարցին պատգամավորը խուսափեց ուղիղ պատասխանից. «Մենք անդրադառնալու ենք Հայաստանի Հանրապետության բոլոր ոլորտներում տեղի ունեցող գործընթացներին»:
Իսկ ԲՀԿ-ն գործող կառավարության ու նրա ղեկավար Հովիկ Աբրահամյանին կքննադատի՞ այնպես, ինչպես քննադատում էր նախկին վարչապետ Տիգրան Սարգսյանին՝ չէ՞ որ Հ. Աբրահամյանը համարվում է ԲՀԿ-ի ստվերային համակարգողը և ֆինանսավորողը: «Մենք խմբակցությունում եթե քննարկենք ու տեսնենք, որ դրա անհրաժեշտությունը կա, մի անձի դեպքում կաշկանդված չենք որևէ հարց բարձրացնել»,- պատասխանեց Վ. Էնֆիաջյանը:
