Շվեդիայի հյուսիսում ավարտվել է արտասովոր մրցույթը, որն արդեն 10 տարի անցկացվում է Վեստերբոտեն մարզի Վիլհելմինա համայնքում: Մրցույթի պայմանների համաձայն՝ մասնակիցները պետք է առնվազն 48 ժամ նստեին սառցե բլոկներից պատրաստված երկմետրանոց բուրգերի վրա:
Հաղթող է դարձել 6 մարդ: Նրանք կկիսեն 20 հազար կրոն մրցանակը (3100 դոլար): 2013-ին եղանակային պայմանները բավականին դաժան են եղել: Գիշերային ժամերին ջերմաստիճանը իջել է մինչև 28.8 աստիճան ցրտի: Դա, սակայն, չի խանգարել մրցույթի մի քանի մասնակիցներին՝ մոտենալ հաղթական ավարտին: Միայն մեկ մասնակից է հրաժարվել պայքարից:
Հաղթողներից 4-ը տղամարդ են, երկուսը՝ կին: Այս մասին հայտնում է ITAR-TASS-ը: Ամեն ժամը մեկ նրանց թույլատրվել է 10 րոպեով իջնել սառցակտորի վրայից և սնվել:
Մասնակիցները, որոնց շարքում եղել են ալժիրցի և աֆղանցի, տաք հագուստներ են կրել: Նրանց խոսքով՝ իրենք պայքարել են ոչ թե դրամական պարգևի, այլ լրագրողների, տեղի բնակիչների և զբոսաշրջիկների ուշադրության համար:
«Կարևորը պատիվն է, սակայն չէի համաձայնի կրկնել մրցույթը»,-խոստովանել է մասնակիցներից մեկը:
