ՀԱԿ-ը՝ որպես դաշինք, որպես հեղափոխական շարժում,դե ֆակտո այլևս գոյություն չունի, և այն կարծիքների տարբերությունը, այն տարաձայնությունները, որ կային ՀԱԿ-ի ներսում,բերեցին նրան, որ փաստացի ՀԱԿ-ի ներսում անկառավարելի իրավիճակ ստեղծվեց՝ անունը կա, որոշ կուսակցություններ, շատ քաղաքական սուբյեկտներ թեև շարունակում են պահպանել իրենց մասնակցությունը, բայց այդ պայմաններում ստեղծվում էր լրիվ անորոշ, կոնֆլիկտային իրավիճակ:Հնարավոր չէր, որ այդ ամենը երկար շարունակվեր:«Առաջին լրատվական»-ի հետ զրույցում այս մասին ասաց ՌԱՀՀԿ փորձագետ Էդգար Վարդանյանը՝ անդրադառնալով ՀԱԿ կուսակցություն ստեղծելու մասին որոշմանը:
«Այդ ֆորմատն ալևս հնարավոր չէր պահպանել, և ՀԱԿ ղեկավարությունը նոր բան է որոշել, որպեսզի կարողանա դրա ներքո պահպանել իր դիրքերը քաղաքական դաշտում: ՀՀՇ-ն հին բրենդ է, չէին կարող այլևս ՀՀՇ-ի միջոցով իրենց ծրագրերն իրականացնել: Մյուս կողմից էլ՝ ընկալելի չէր լինի, եթե հայտարարեին՝ Կոնգրեսը գոյություն չունի, մենք փակում ենք, ինքնալուծարվում ենք և այլն:Թեև հիմա էլ գործընթացները ցույց են տալիս, որ նույնիսկ այս դեպքում նրանք շահեկան վիճակում չեն գտնվում, որովհետև շատերը ոչ միայն կուսակցության անդամ չեն դառնա, այլ նաև՝ եթե այսպես շարունակվի,դաշինքից էլ դուրս կգան»:
Էդգար Վարդանյանի կարծիքով՝ խնդիրն այն է, թե այդ կուսակցությունը ինչ նպատակներ է հետապնդելու, և ինչպես է այս իրավիճակում պատրաստվում դրանք իրագործել. «Էլի հռչակելու են, որ իրենց հիմնական նպատակը ավազակապետությունը կործանե՞լն է՝ սա պարզ է, բայց խնդիրն այն է, թե հանրությանը կոնկրետ ի՞նչ ճանապարհ են ներկայացնելու և ինչպե՞ս են պատրաստվում հասնել այդ նպատակներին:
Չեմ կարծում, որ ՀԱԿ դաշինքի վերջին շրջանի մոտեցումներից էապես տարբերվող մոտեցումներ կորդեգրեն, իսկ թե ինչ մոտեցումներ են դրանք՝ մարդիկ արդեն ծանոթ են»:
Ինչ վերաբերում է Նիկոլ Փաշինյանին, ով վերջին շրջանում խմբակցության ներսում տարաձայնություններ ունի,Էդգար Վարդանյանի կարծիքով՝ նա չի մտնի կուսակցության մեջ.«Նույնիսկ համոզված եմ, որ չի մտնի, իսկ դաշինքի մեջ մնալը կախված կլինի նրանից, թե ինչ զարգացումներ կլինեն՝ այս պահի դրությամբ դժվարանում եմ պատասխանել»:
