Բրիտանական ոստիկանությունը ձերբակալել է հյուսիսային Անգլիայի մի բնակչի, որը մեղադրվում է համացանցում ԱՄՆ-ում երեխաների զանգվածային սպանության սպառնալիք տեղադրելու համար:
Sky News հեռուստաալիքի հաղորդմամբ՝ ձերբակալվել է 24-ամյա Ռիս Էլիոթը, որն ապրում է Թայն-ենդ-Ուիր կոմսության Սաութ-Շիլդս քաղաքում:
Հետաքննության տվյալներով՝ նա չորեքշաբթի օրը Facebook-ի իր էջում տեղադրել է անանուն հաղորդագրություն, որում նշված է եղել. «Ես մտադիր եմ սպանել նախ հորս և նրան աղբը նետել: Հետո ավտոմեքենա կնստեմ և արագ կսլանամ: Եթե ստացվի, մտադիր եմ սպանել 200 երեխայի, հետո ինձ կսպանեմ»:
Բրիտանացի հետաքննիչների կարծիքով՝ խոսքը ցինիկ կատակի մասին էր, սակայն հաղորդագրությունը խուճապ է առաջացրել Ամերիկայի Թենեսի նահանգի բնակիչների շրջանում:
Համացանցում այս տեղեկությունը հրապարակելուց հետո Ուորեն կոմսության 11 դպրոցներում սահմանվել է ոստիկանական հսկողություն, մոտ 3000 երեխա հինգշաբթի և ուրբաթ օրերին դպրոց չի հաճախել:
Հաղորդագրության հեղինակը ձերբակալված է, նրան սպանության սպառնալիքի մեղադրանք է առաջադրվել:
