Վրացական ոստիկանությունը կալանավորել է փետրվարի 8-ին ազգային գրադարանի մոտ կայացած բողոքի ակցիայի երեք մասնակիցների՝ հաղորդում է «Ինտերֆաքս» գործակալությունը:
Ուրբաթ օրը կայացած բողոքի ակցիան, որն ուղղված էր նախագահ Միխեիլ Սաակաշվիլիի դեմ, վերածվել է անկարգության: Ազգային գրադարանի մոտ հավաքված ցուցարարները, որտեղ Սաակաշվիլին պետք է հանդես գար ժողովրդին ուղղված ամենամյա ուղերձով, ծեծել են նախագահամետ «Ազգային շարժում» կուսակցության մի քանի պատգամավորների:
ՆԳՆ-ում ենթադրում են, որ վեճը հրահրել են հենց Սաակաշվիլիի կողմնակիցները: Ոստիկանությունը նրանց համար երկու միջանցք է պատրաստել շենք մտնելու համար, սակայն նրանք գերադասել են անցնել իրենց ընդդիմախոսների ամբոխի միջով: Սաակաշվիլին ստիպված էր չեղյալ հայտարարել իր այցը գրադարան, իսկ ժողովրդին դիմել է իր նստավայրից:
Ակցիային մասնակցում էին Սաակաշվիլիի այն հակառակորդները, ովքեր դատապարտվել էին ազատազրկման, սակայն 2012 թվականին քաղբանտարկյալի կարգավիճակ էին ստացել, իսկ 2013-ին համաներմամբ ազատության մեջ հայտնվել:
