Բելգիայի Աալստեում կառնավալին մասնակցող Eftepie խմբի անդամները, որոշել են փետրվարի 10-ին տոնին ներկայանալ հրեաներին համակենտրոնացման ճամբարներ տեղափոխող նացիստական վագոնի մակետով: Նրանք կկրեն նաև ԷսԷս-ի համազգեստ, գրում է Agence France-Presse-ը:
Նման կերպ նրանք մտադիր են ծաղրել ֆլամանդացի ազգայնականներին:
Վագոնի վրա գրված է «Ֆրանկոֆոններին արտահանձնելու համար», իսկ ներսում կազմակերպիչները մտադիր են տիկնիկ տեղադրել, որը նման կլինի Բելգիայի վարչապետին՝ ֆրանկոֆոնական Սոցիալիստական կուսակցության ղեկավար Էլիո դի Ռուպոյին:
Կառնավալի մասնակիցները պատրաստվում են քայլերթով անցնել նացիստական համազգեստով, որի վրա SS խորհրդանշանի փոխարեն կհայտնվի SS-VA գրությունը, որը ծաղրում է «Նոր ֆլամանդական դաշինք» (N-VA) կուսակցության անվանումը:
Eftepie խմբի գաղափարը որևէ պաշտոնական անձի հավանությանը չի արժանացել:
«Նոր ֆլամանդական դաշինքի» ղեկավար Բարտ դե Վեվերին դուր չի եկել իր կուսակցությունը նացիստների հետ համեմատելու գաղափարը:
Երկրի հրեական համայնքին Eftepie-ի նման որոշումը հատկապես է վիրավորել, գրում է բելգիական Doorbraak պարբերականը:
Շքերթի կազմակերպիչները բացատրել են, որ այդկերպ ցանկանում են ցուցադրել ֆլամանդացի ազգայնականների ծիծաղելի քաղաքականությունը:
