Ինչպես տեղեկացնում է Գյումրու «Շիրակ»-ի պաշտոնական կայքը, արդեն հայտնի են դարձել բոլոր չորս թիմերը, որոնց հետ «Շիրակ»-ը կմրցի երրորդ ուսումնամարզական հավաքի ընթացքում: Նշենք, որ «Շիրակ»-ը փետրվարի 11-25-ն ուսումնամարզական հավաք է անցկացնելու Անթալիայում:
Փետրվարի 13-ին «Շիրակ»-ի մրցակիցը լինելու է ռումինական «Վիտորուլ» (Կոնստանցա) թիմը, որի սեփականատերն է նախկինում հայտնի ֆուտբոլիստ Գեորգի Հաջին:
«Վիտորուլ»-ը ելույթ է ունենում Ռումինիայի բարձրագույն խմբում և 19-րդ տուրից հետո գտնվում է 11-րդ հորիզոնականում:
Փետրվարի 16-ին գյումրեցիներն ուժերը չափելու են «Յեդինստվո» թիմի հետ, որն այժմ 18 միավորով ընթանում է Մոնտենեգրոյի Առաջին լիգայի 9-րդ հորիզոնականում:
Չորս օր անց՝ փետրվարի 20-ին, «Շիրակ»-ն ստուգողական հանդիպում կանցկացնի ղազախական «Օրդաբաս»-ի հետ: Ղազախստանի ընթացիկ առաջնությունում «Օրդաբաս»-ը 26 տուրից հետո 39 միավորով գտնվում է 7-րդ հորիզոնականում:
Վերջին հանդիպումը «Շիրակ»-ը կանցկացնի փետրվարի 24-ին՝ մրցելով Ալչևսկի «Ստալ»-ի հետ: Ուկրաինական այս ակումբը, որտեղ ժամանակին արդյունավետ խաղ է ցուցադրել Արա Հակոբյանը, Ուկրաինայի առաջին խմբում ներկայումս ընթանում է 2-րդ տեղում:
